Փաստ ինֆո

Տավուշի սահմանամերձ գյուղերում այս պահին իրավիճակն ընդհանուր առմամբ խաղաղ է, բնականոն մեր կյանքով ապրում ենք,- «Փաստինֆո»-ի հետ զրույցում ասաց Տավուշի մարզի Մովսես գյուղի քահանա Տեր Աբելը՝ նշելով, որ կրակոցներ լինում են, ինչի հետևանքով էլ գյուղերում հայաթափման վտանգ է առաջացել։

«Կրակոցները մեր կյանքի անբաժան մասն են, դրանց չենք էլ անդրադառնում արդեն»,-ասաց Տեր Աբելը և արձանագրեց, որ հակառակորդը կրակոցներով ցանկանում է վախի մթնոլորտ ստեղծել հանրության մոտ։

«Վախի դեպքում բնական ինստինգտով մարդը ցանկանում է իր միջավայրը փոխել, բնության մեջ էլ է այդպես, երբ կենդանին տեսնում է, որ կյանքին վտանգ է սպառնում, փախուստի է դիմում, լքում է այդ միջավայրը, որպեսզի իր կյանքին վտանգ չլինի: Բնական պահվածք է սա, դրա համար էլ ես ոչ մեկին չեմ մեղադրում գնալու համար: Մենք միայն հիմա չի, որ լքում ենք բնակավայրերը, կամաց-կամաց բնակիչները գնացել են, գյուղերը դատարկվել են, մեր բնակիչների մեծ մասը հիմա ապրում է արտերկրում, գյուղերը մի տեսակ աղքատացած և որբացած են»,-ասաց Տեր Աբելը:

Տեր հայրն անհանգստություն հայտնեց, որ Տավուշում ևս հնարավոր է այնպիսի գործընթացներ զարգանան, ինչպես Սյունիքում, որի հետևանքով որոշ տարածքներ կանցնեն թշնամու վերահսկողության տակ։

«Իմ մտքում այդպիսի վախեր կան, չենք ուզում գործողությունների շղթան այդ ուղղությամբ գնա, բայց տրամաբանությունը հուշում է, որ հնարավոր է՝ դա իրականության դառնա: Առհասարակ, բնավորություն չունենք ասեկոսեներին տեղ տալու, բայց պաշտպանված և անվտանգ լինելու առումով՝ մեծ ուշադրությամբ ենք հետևում բոլոր գործընթացներին»,-ասաց նա և հավելեց, որ երբ իրենց քաջությամբ հայտնի հրամանատարները փոխվում են և օրհասական պահի գալիս են անհայտ հրամանատարներ, դա ևս անհանգստության տեղիք է տալիս.

«Մեզ մոտ բանակային 3-րդ կորպուսն է հայրենիքի պաշտպանության գործով զբաղվում՝ շատ հմուտ հրամանատարով, Գրիգոր Խաչատուրովի մասին է խոսքը, անհասկանալի պատճառներով նա այլևս չի ծառայում հայրենիքին, սա մտահոգություն է առաջացնում և վախի մթնոլորտը սկսում է խորանալ: Զինվորականների հետ, երբ շփվում ենք, վառոդի հոտ առած, մարտական հոտառություն ունեցող տղաներն ուրիշ են, ուրիշ ձև են արձագանքում թշնամու ոտնձգություններին, ուրիշ ոգով են առաջնորդվում, դա մեզ համար անվտանգային հանգստություն է»,-ասաց զրուցակիցը:

Տեր Աբելի խոսքով՝ բնակիչների մոտ իր համար զարմանալի հանդարտություն և հանգստություն կա.

«Ինչո՞ւ ինձ զարմացնող, որովհետև բնական վիճակ կա մարդու մոտ, որ վախի պարագայում գործողությունները պետք է այլ լինեն, այդ վախը՝ ճիշտ չափաբաժնով, ոչ թե կենդանական բնազդը գործի պետք է դնենք և փախչենք, այլ՝ ընդհակառակը, կարողանանք պաշտպանվել, եթե այդ վախի զգացողությունը չկա, վաղը չէ մյուս օրը կարող է պաշտպանվելու ցանկություն չլինել:Սա անհանգստացնում է ինձ, այդ վիճակում կստացվի, որ ժողովուրդը, չպատկերացնելով հանդերձ, վտանգավոր փորձությունների է գնում»,-ասաց հոգևորականը և միևնույն ժամանակ արձանագրեց, որ սա ընդհանուր խնդիր է մեր հասարակության շրջանում.

«Խոսքը նյութին է վերաբերվում, նյութականացված մարդը հոգևոր վտանգները չի տեսնում, հոգևոր վտանգներ չտեսնելով հանդերձ՝ մարմնավոր վտանգներն էլ չի տեսնում: Երբ մարդը նյութապաշտ է, այդ պարագայում մարդը հոգևոր առումով թուլանում է, և որևէ պաշտպանական բնազդ չի աշխատում: Երբ մարդը կորցնում է զգոնությունը, սկսում է հանդուրժող լինել, ասում է՝ դե ոչինչ, թող էսպես լինի, մի քիչ էլ սաստկացավ, ասում է՝ դե, ոչինչ, թող էսպես լինի և այսպես գնում է մահվան»,-ասաց նա:

Իսկ թե իր գնահատմամբ՝ իշխանություններն անո՞ւմ են անհրաժեշտ քայլերը մեր սահմանների պաշտպանվածությունը և ժողովրդի անվտանգությունն ապահովելու համար, Տեր Աբելն ասաց, թե տպավորություն ունի՝ « մեզ մոտ իշխանության ղեկը գտնվում է մանուկների ձեռքին, որոնք ոնց ուզում, քշում են այդ ղեկը»

«Ես դավադրական տեսություններին չեմ ուզում անդրադառնալ, մարդիկ, ովքեր ռեալ ինֆորմացիա ունեն, իրենք պետք է գնահատական տան և պատասխանեն՝ ինչպե՞ս եղավ, որ 2018թ-ին 218մլն դոլար Ադրբեջանից մտավ Հայաստան, ո՞վ ստացավ այդ գումարը և ո՞վ էր փոխանցել, թող գնան այդ հարցերի պատասխանները գտնեն: Աստվածաշնչում Եսայի մարգարեն մի շատ հետաքրքիր բան է ասում, ասում է՝ տղամարդկանց պետք է վերցնեմ այդ ժողովրդի միջից, ռազմիկին պետք է վերցնեմ և իշխանությունը պետք է տամ մանուկներին: Ինձ մոտ հիմա տպավորություն է, իշխանության ղեկը գտնվում է մանուկների ձեռքում, ոնց ուզում, քշում են այդ ղեկը: Ոչ մի ոլորտ իր պատասխանատուն չունի, ոչինչ չենք հասկանում՝ ինչը ինչի հետևանք է, անալիտիկա չկա, խնդիրներ են գալիս, ուզում ենք դրանք լուծել՝ չհասկանալով, որ ավելի ենք խորանում: Այս ամենը գալիս է նրանից, որ թափառողի հոգեբանություն ունենք մենք հիմա»,-ասաց նա:

Հարցին՝ թե հետպատերազմական ճգնաժամային իրավիճակում որը՞ պետք է լինի հոգևորականության դերը, Տեր Աբելը վստահեցրեց, որ հոգևորականությունը իր հասանելիք քայլերն անում է.

«Ամեն կիրակի Սուրբ պատարագ է տեղի ունենում, Աստված գալիս է և իր ժողովրդին սնում: Հոգևորականությունը պետք է մարդ և Աստված հարաբերությունների միջնորդը լինի: Որևէ մեկն իրեն հարց տվեց՝ այս պատերազմի ընթացքում այդքան սգակիր մայրերին և հայրերին ո՞վ է սփոփել, այն լավ բաները, որ եկեղեցին, եկեղեցականները անում են, դա չի երևում: Գերիների խնդրի հետ կապված ևս միջնորդություններ եղան, բայց հոգեւոր իշխանությունն այդ լծակները չունի, ցավոք»,-ասաց Տեր հայրը:

Նիկոլ Փաշինյանը բազմաթիվ անգամներ իր ելույթներում թիրախավորել է հոգևորականությանը, տարբեր մեղադրանքներ հնչեցրել, իշխանափոխությունից անմիջապես հետո էլ տարբեր ակցիաներ կազմակերպվեցին Երևանում՝ ընդդեմ հոգևորականության:

Ի վերջո՝ ի՞նչ նպատակ էր հետապնդում հոգևորականության դեմ արշավը, Տեր Աբելը արձագանքեց.

«Որևէ ամրոց, որ մտնում ես, շատ նուրբ ձևերով քանդելու հենասյուներ կան, այդ հենասյուները պետք է քանդես, եթե չքանդես, չես կարող մտնել: Ես այդ ժամանակ մի հետաքրքրիր հոդված գրեցի, որից հետո լսվեց մի խոսք՝ պետությունը և եկեղեցին անջատ են, ես ասեցի՝ պարո՛ն վարչապետ, միգուցե ֆորմալ առումով մեզ ստիպե՞լ են այդպիսի բան ասել, բայց հուսամ՝ ձեր սրտում այդպես չէ, եկեղեցին և պետությունը անջատ չեն, այս ամենին հետևեցին այն քայլերը, որը տեսնում ենք: Սա նշանակում է, որ կա հոգևոր առումով պաշտպանվածության հենասյուն, եթե խփում ես դրան քանդելու նպատակով, ուրեմն առողջ չեն քո նպատակներն այդ տուն մտնելու, սա այնքան ակներև է, բայց քանի որ մեր ժողովուրդը հոգևոր առումով անպատրաստ է, չտեսավ դա»:

Աղբյուր` Փաստինֆո