Փաստ ինֆո

Վերաքննիչ քրեական դատարանում՝ դատավոր Նարինե Հովակիմյանի նախագահությամբ, կազմով դատավորներ Կարեն Մարդանյանի, Սևակ Համբարձումյանի, այսօր շարունակվել է ՀՀ երկրորդ նախագահ Ռոբերտ Քոչարյանի և մյուսների նկատմամբ ՀՀ քրեական օրենսգրքի 300.1-րդ հոդվածի հատկանիշներով քրեական հետապնդումը դադարեցնելու և գործով վարույթը կարճելու որոշման դեմ բողոքների վերաբերյալ քննությունը։

Ինչպես արդեն տեղեկացրել ենք՝ նախորդ դատական նիստին, թեև բողոքների քննությունն, ըստ էության ավարտվել էին, մեղադրող դատախազ Գևորգ Բաղդասարյանը միջնորդություն է ներկայացրել՝ գործով վարույթը կասեցնելու և ՍԴ դիմելու մասին, իսկ միջնորդության հիմքում դրվել է նաև «Հայկական Ժամանակ» օրաթերթն ընդդեմ ՀՀ-ի գործով վճռում առկա իրավական գնահատականները։

«Փաստինֆո»-ի թղթակցի հաղորդմամբ՝ այսօր կայացած դատական նիստին միջնորդության վերաբերյալ պետք է դիրքորոշում հայտներ պաշտպանության կողմը, սակայն մինչ դրան անցնելը, բուռն քննարկումներ ծավալվեցին՝ կապված ՄԻԵԴ վճռի թարգմանության պաշտոնական լինել-չլինելու հարցի հետ կապված։ Պաշտպան Արամ Օրբելյանը մատնանշեց թարգմանության մեջ առկա որոշակի սխալ ձևակերպումներ։ Նրա դիտարկմամբ՝ փաստաթղթով որևէ նոր փաստական հանգամանք չի հաստատվել, սակայն եթե դատարանը գտնում է, որ պետք է թարգմանությունը կիրառվի, ապա կմիջնորդեն, որ թարգման ներգրավվի։

Մեղադրող Գևորգ Բաղդասարյանն էլ արձագանքեց՝ եթե պատասխանի արժանի կերպով, կասեն՝ անհարգալից վերաբերմունք է։

«Չեմ կարողանում հասկանալ՝ ինչու իմ ներկայացրած միջնորդության ստորագրությունը դատաձեռագրաբանական փորձաքննություն չենք արել, պարզելու՝ ես եմ ստորագրել, թե ոչ։ Չեմ կարողանում հասկանալ՝ ինչպես կարելի է նման խնդիր ստեղծել պրիմիտիվ հարցի քննարկման շրջանակներում, հետո էլ՝ ժպտալով ասել՝ մենք շատ ենք ուզում արագ ավարտել։ Մենք համոզվել ենք արդեն, որ պաշտպանության կողմը ահավոր շատ ուզում է, որ այս պրոցեսն ավարտվի։ Բոլորի համար դա ակնհայտ է, հատկապես, երբ դա ժպտալով են ասում»,- հեգնանքով նշեց Բաղդասարյանը՝ հավելելով, որ ներկայացված թարգմանությունը կատարվել է պետության կողմից, ԵԴ-ում ՀՀ ներկայացուցչի պաշտոնական կայքում նույն թարգմանությունն արդեն դրված է։

Թարգմանության պաշտոնական լինել-չլինելու հարցը քննարկելուց հետո դատարանը լսեց ներկայացված միջնորդության վերաբերյալ պաշտպանության կողմի առարկությունները։ Պաշտպան Հովհաննես Խուդոյանը նշեց, որ այն կրկնում է դատախազության նախորդ միջնորդությունը և եթե այն չներկայացվեր, ապա բողոքների քննությունն արդեն վաղուց ավարտված կլիներ, դատարանը հեռացած կլիներ խորհրդակցական սենյակ և որոշում կայացված կլիներ։ Ներկայացնելով միջնորդության վերաբերյալ առարկությունները՝ Խուդոյանն արձանագրեց, որ առաջին ատյանի դատարանը չի անտեսել Քրեական դատավարության օրենսգրքի համապատասխան հոդվածների՝ Սահմանադրության համապատասխանության խնդիրը, այլ՝ գտել է, որ քրեական հետապնդումը բացառող հանգամանքների պայմաններում նոր մեղադրանք առաջադրելու հնարավորությունն արգելափակող իրավակարգավորումների սահմանադրականությունը վիճարկելու նախաձեռնությունը համատեղելի չէ արդարադատության գործընթացի հետ, դատարանի նման նախաձեռնությունը կհանգեցնի մրցակցության և անմեղության կանխավարկածի խախտման։ Խուդոյանն ընդգծեց՝ խիստ խնդրահարույց է դատախազության այն մոտեցումը, որ պետք է ցանկացած միջոց գործադրվի՝ նախագահ Քոչարյանին պատասխանատվության ենթարկելը։ Ինչ վերաբերում է տուժողների իրավունքներին, Խուդոյանը նշեց, որ տուժողների իրավունքները ենթակա են պաշտպանության, սակայն նրանց իրավունքների իրացումը երբեք չի կարող ապահովվել ամբաստանյալների կամ դատավարության այլ մասնակիցների իրացման խոչընդոտմամբ։ Նրա խոսքով՝ իրականությունն այն է, որ տուժողների իրավունքները խախտվել են ՀՔԾ-ի կողմից՝ ոչ պատշաճ, ոչ որակյալ, ոչ ամբողջական և ոչ օբյեկտիվ քննություն իրականացնելով, ինչպես նաև՝ ՀՀ գլխավոր դատախազը և գործի նկատմամբ հսկողություն իրականացնող դատախազները։

Լսելով կողմերի դիրքորոշումը՝ դատարանը հետաձգեց միջնորդության լուծումը, որոշումը կկայացվի վերջնական դատական ակտ կայացնելիս։ Նկատի ունենալով, որ բողոքների քննությունն, ըստ էության, ավարտվել է, Վերաքննիչ դատարանը հեռացավ խորհրդակցական սենյակ՝ որոշում կայացնելու։ Որոշումը կհրապարակվի վաղը՝ ժամը 17.00-ին։

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։ ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։ Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Հեղինակ՝ Իզաբել Սահակյան

Աղբյուր` Փաստինֆո