Փաստ ինֆո

ՀՀ սահմանադրական դատարանը՝ Ա․Դիլանյանի նախագահությամբ, քննում է կորոնավիրուսի դեմ պարտադիր պատվաստումների և թեստավորումների մասին ՀՀ առողջապահության նախարարի հրամանի՝ Սահմանադրության համապատասխանության վերաբերյալ ԱԺ «Հայաստան» խմբակցության դիմումը։ 

«Փաստինֆո»-ի թղթակցի հաղորդմամբ՝ զեկուցող դատավոր Էդգար Շաթիրյանը նշեց, որ դիմող կողմն առերևույթ սահմանադրականության խնդիր է տեսնում։ Այն է՝ պարտավորություններ են դրվել անձանց որոշակի շրջանակների վրա, մասնավորապես, աշխատողները կամ պետք է պատվաստվեն, կամ պետք է թեստավորվեն, ընդ որում՝ սեփական միջոցներով։

ՍԴ դատավոր Արևիկ Պետրոսյանը, դիմելով զեկուցողին, նշեց, որ նախարարության կողմից տրամադրվել են մի շարք ակտեր, այդ թվում՝ «միզուղիների խնդիրների վերաբերյալ» ուղեցույց, ինչը որևէ կապ չունի կորոնավիրուսի վերաբերյալ վիճարկվող իրավական ակտի հետ, ինչին ի պատասխան Շաթիրյանը հաստատեց, որ հասկանալի է, որ դա և մի շարք այլ ակտեր որևէ կապ չունեն վիճարկվող ակտի հետ։

Շարունակելով հարցադրումները՝ Պետրոսյանը բարձրացրեց աշխատանքից ազատման դեպքերի վերաբերյալ խնդիրը, ինչին ի պատասխան զեկուցողը հայտնեց, որ դա, սովորաբար, մեկնաբանվում է որպես աշխատանքից անհարգելի բացակայության հիմքով աշխատանքից ազատում։

Ինչ վերաբերում է թեստավորման գներին, ապա Շաթիրյանը հայտնեց, որ այդ հարցով դիմել է ՀՀ առողջապահության նախարարությանը, որտեղից, սակայն, նշել են, որ դա իրենց իրավասության տիրույթից դուրս է, քանի որ թեստավորումներ իրականացվում են մասնավոր լաբորատորիաների կողմից։

Անդրադառնալով կորոնավիրուսի դեմ թեստավորումների վերաբերյալ կեղծ հավաստագրերին և հարցադրմանը, թե արդյո՞ք պարզվել է, թե քանի նման դեպք կա, զեկուցողը հայտնեց՝ դա պարզելու գործիքակազմ չկա։

Հեղինակ՝ Իզաբել Սահակյան

Աղբյուր` Փաստինֆո