Փաստ ինֆո

Փաշինյանի և նրա ընտանիքի նկատմամբ բռնություն գործադրելու հրապարակային կոչեր կատարելու մեջ մեղադրվող պատմության ուսուցիչը ոչնչից չի վախենում։ Այս մասին Երևանի ընդհանուր իրավասության դատարանում հայտարարել է ինքը՝ ուսուցիչ Հակոբ Գրիգորյանը, որը հայտնվել է մեղադրյալի աթոռին։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, այսօր կայացել, ապա՝ րոպեներ անց հետաձգվել է պատմության ուսուցիչ Հակոբ Գրիգորյանի գործով առաջին դատական նիստը։ Նիստի մեկնարկին Գրիգորյանը դատարանին տեղեկացրել է, որ չունի պաշտպան, իսկ փաստաբանական վճարովի ծառայություններից օգտվելու համար էլ միջոցներ չունի, քանի որ քրեական գործի առկայությամբ պայմանավորված ազատվել է աշխատանքից, ուստի, դատարանից ժամանակ խնդրեց՝ հանրային պաշտպանի ներգրավման համար։

Գրիգորյանը նաև հայտնեց, որ ինքն Արցախյան ազատամարտի մասնակից է, հաշմանդամություն է ձեռք բերել։

Դատարանը հետաձգեց դատական նիստը՝ ամբաստանյալի պատշաճ պաշտպանության իրավունքի իրացման համար հանրային պաշտպան ներգրավելու նպատակով։ Հաջորդ դատական նիստը նշանակվել է դեկտեմբերի 20-ին։

Հիշեցնենք, որ Երևանի Գայի անվան իվ 129 հիմնական դպրոցի ուսուցիչ Հակոբ Գրիգորյանը մեղադրվում է ՀՀ քրեական օրենսգրքի 226,2-րդ հոդվածի 2-րդ մասի 2-րդ կետի հատկանիշներով։ Ըստ նախաքննական մարմնի, պատմության ուսուցիչը համաձայն չի եղել ՀՀ վարչապետ Նիկոլ Փաշինյանի վարած քաղաքականության հետ և 2021 թվականի մայիսի 21-ին՝ 7-րդ դասարանի պատմության դասաժամին, աշակերտների ներկայությամբ, իբր, հանդես է եկել ՀՀ վարչապետ Նիկոլ Փաշինյանի և նրա ընտանիքի անդամների նկատմամբ բռնություն գործադրելու հրապարակային կոչերով, այն է՝ հայտարարել է, որ Նիկոլ Փաշինյանին պետք է սպանել, նրան և նրա ընտանիքին պետք է հրապարակում վառել: Նախաքննության ընթացքում Գրիգորյանն ընդունել է առաջադրված մեղադրանքը և զղջացել կատարվածի համար։

Հեղինակ՝ Իզաբել Սահակյան

Աղբյուր` Փաստինֆո