Փաստ ինֆո

ԱԺ պաշտպանության և անվտանգության հարցերի մշտական հանձնաժողովի արտահերթ նիստը հերթական անգամ լարված մթնոլորտում անցավ։

ՔՊ-ական պատգամավոր Վահագն Ալեքսանյանը ընդդիմությանը մեղադրեց ապատեղեկատվություն տարածելու մեջ: Ալեքսանյանը, արձագանքելով Գեղամ Մանուկյանի հայտարարությանը, թե՝ «հանրությունը, տեղեկատվություն չստանալու պարագայում, հայացքն ուղղում է թշնամական պետության տեղեկատվական աղբյուրներին», ասաց.

«Ձեզ սպասարկող լրատվամիջոցներն են իրենց երեսը թեքում ադրբեջանական լրատվամիջոցների կողմը, ձեզ սատարող լրատվամիջոցներն են, որ ադրբեջանական լրատվամիջոցների ամեն զազրելի բան բերում, մտցնում են հայկական դաշտ, հայ գերիների ոչ պատշաճ վիճակում վիդեոներ են հրապարակում իրենց կայքերում: Ձեր ներկայացրած պաշտպանության հանձնաժողովի փոխնախագահի թեկնածուն էլ իր էջում կիսվում է տեղեկատվությամբ, թե զոհված հայ զինվորը ադրբեջանցի գերիներ է հետ տանելիս եղել, այդ պահին իրեն գերի են վերցրել և տեղում ծեծելով սպանել, և սա այն դեպքում, երբ հայ զինվորը զոհվել է նռնակի պայթյունից մարտի ժամանակ»:

«Հայաստան» խմբակցության քարտուղար Արծվիկ Մինասյանն էլ իր հերթին իշխանությանը մեղադրեց ամեն անգամ մանիպուլյացիաների միջոցով սուտ տեղեկություններ տարածելու մեջ:

Հանձնաժողովի նախագահ Անդրանիկ Քոչարյանն ընդհատեց Մինասյանին՝ «Սուտը ինքներդ եք ասում, անձամբ՝ դուք, ստախոսը ինքնե՛րդ եք», - բղավեց Քոչարյանը։

Արծվիկ Մինասյանն էլ պահանջեց, որ խոսելիս իրեն չընդհատել.

«Դուք դեռ պետք է դատվեք: Դուք և Վահագն Ալեքսանյանը հայտարարում եք՝ «գուցե «Հայաստան» դաշինքն է Ադրբեջանին հրավիրել», հենց հիմա դրա համար ձեզանից պատասխան եմ պահանջում: Դուք դատվելու եք, ոչ միայն այս հանցագործության համար»,-ասաց Արծվիկ Մինասյանը:

Վահագն Ալեքսանյանն էլ միջամտեց. «Դատվողները շատ շուտով կդատվեն, մի՛ կասկածեք պարոն Մինասյան»:

Ընդդիմադիր պատգամավորներ Գեղամ Մանուկյանը և Արծվիկ Մինասյանը լքեցին նիստերի դահլիճը:

Անդրանիկ Քոչարյանն էլ բացականչեց հեռացող ընդդիմադիր պատգամավորների հետևից.

«Գնացե՛ք, փողոցում ձեր գործը արեք, դուք այստեղ միայն շոուի համար եք»:

Աղբյուր` Փաստինֆո