Փաստ ինֆո

Ադրբեջանի պահվածքն ավելի լայնորեն քննարկման առարկա պետք է դառնա ոչ միայն եռակողմ ֆորմատում, ոչ միայն ՀԱՊԿ-ում, ոչ միայն ՄԱԿ-ում։ Առցանց մամուլի ասուլիսի ժամանակ ասաց ՀՀ վարչապետ Նիկոլ Փաշինյանը։

Նա ասաց, որ առաջիկայում պատրաստվում է մասնակցել նաև ժողովրդավարության գագաթնաժողովին և այնտեղ նույնպես պատրաստվում է բարձրացնել այս հարցը։

«Այն, ինչ անում է Ադրբեջանը, դա Հայաստանի ինքնիշխանության, պետականության, անկախության և ժողովրդավարության վրա հարձակում է նրա ու նրան քաջալերող երկրների կողմից։ Այս հարցը պատրաստվում ենք հետապնդել միջազգային բոլոր հնարավոր հարթակներում և մեզ չենք սահմանափակելու»,-ասաց վարչապետը։

Հարցին՝ արդյոք պատերազմի վտանգ կա՞, Նիկոլ Փաշինյանը նկատեց կա Ադրբեջանի ագրեսիվ պահվածք, որը պետք է զսպվի, այդ թվում միջազգային լծակներով։

«Մենք չենք խուսափում Ադրբեջանի հետ ուղիղ շփումներից։ Ինչու է պաշտպանության նախարարների միջև այս կոմունիկացիան ձևավորվում, որովհետև բավական է երկու կողմերն իրար մեղադրեն սադրանքների մեջ։ Մեր պաշտպանության նախարարին հանձնարարել եմ, որ ակտիվորեն այդ կոմունիկացիան օգտագործի և Ադրբեջանի զինված ուժերի կողմից հրադադարի խախտման դեպքերի մասին տեղեկատվություն փոխանակի Ադրբեջանի պաշտպանության նախարարի հետ, որ տեսնենք՝ ով ինչպես է արձագանքում։ Այսկերպ ակնհայտ կդառնա, թե ով է ավելի շահագրգիռ սադրանքների մեջ»,-ասաց Նիկոլ Փաշինյանն ու ավելացրեց, որ «եթե պարզվի երկու կողմն էլ շահագրգիռ չեն՝ շատ ավելի լավ»։

Աղբյուր` Փաստինֆո