Փաստ ինֆո

«Դրոյի» գործով ցմահ ազատազրկման դատապարտված Արսեն Արծրունին ազատ է արձակվել՝ 28 տարի անազատության մեջ գտնվելուց հետո։ Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, քիչ առաջ որոշում կայացրեց՝ Արսեն Արծրունուն պայմանական վաղաժամկետ ազատ արձակելու մասին։ Տեղեկությունը «Փաստինֆո»-ին հայտնեցին դատարանից։ 

Հիշեցնենք, որ ՀՀ Գերագույն դատարանի քրեական գործերի դատական կոլեգիայի 1996 թվականի դեկտեմբերի 10-ի դատավճռով Արսեն Արայի Արծրունին մեղավոր է ճանաչվել 1961 թվականին ընդունված քրեական օրենսգրքի 72-րդ, 17-100-րդ հոդվածներով, 17-99-րդ հոդվածի 8-րդ կետով և դատապարտվել 1961 թվականին ընդունված քրեական օրենսգրքի 72-րդ հոդվածով 12 տարի ժամկետով ազատազրկման, նույն օրենսգրքի 17-100-րդ հոդվածով 12 տարի ժամկետով ազատազրկման, նույն օրենսգրքի 17-99-րդ հոդվածի 8-րդ կետով մահապատժի:

1961 թվականին ընդունված քրեական օրենսգրքի 37-րդ հոդվածի հիման վրա նվազ խիստ պատիժն ավելի խիստ պատժի մեջ կլանելու սկզբունքով Ա.Արծրունու նկատմամբ վերջնական պատիժ է նշանակվել բացառիկ պատժամիջոց մահապատիժ: Հայաստանի Հանրապետության Նախագահի 2003 թվականի օգոստոսի 1-ի թիվ ՆՀ-103-Ա հրամանագրով Ա.Արծրունուն ներում է շնորհվել, և նրա նկատմամբ նշանակված մահապատիժը փոխարինվել է ցմահ ազատազրկմամբ:

Արսեն Արծրունու պատժի կրման ռեժիմը նախորդ տարի փոխվել է՝ ՀՀ ԱՆ տեսաբաշխման հանձնաժողովի կողմից։ Արծրունին պատիժը կրում էր բաց տեսակի հիմնարկում, ինչի համար հիմք էր հանդիսացել դրսևորած դրական վարքագիծը։

Հեղինակ՝ Իզաբել Սահակյան

Աղբյուր` Փաստինֆո