Փաստ ինֆո

Տևական ժամանակ է՝ առաջանագծի տարբեր հատվածներում տեղի են ունենում ռազմական գործողություններ, միևնույն ժամանակ, աննախադեպ երևույթ է տեղի ունենում Հայաստանի պաշտպանական ոլորտում, երբ հանրությունը զրկվում է ամբողջական տեղեկատվություն ստանալու հնարավորությունից: Հանձնաժողովի բոլոր անդամները, վստահ եմ, գիտակցում են՝ ինչ վտանգներով է սա հղի, երբ հայ հանրությունը, տեղեկատվություն չստանալու պարագայում, հայացքն ուղղում է թշնամական պետության տեղեկատվական աղբյուրներին: Այս մասին Պաշտպանության և անվտանգության հարցերի մշտական հանձնաժողովի նիստի ժամանակ ասաց «Հայաստան» խմբակցության պատգամավոր Գեղամ Մանուկյանը:

Ըստ պատգամավորի՝ ՊՆ-ն իր գործունեության ողջ ընթացքում առաջին անգամ պաշտոնական հաղորդագրությամբ տեղեկացնում է, որ կան զոհեր, բայց չի հրապարակում զոհերի թիվը, անունները, և դրա արդյունքում հանրության մեջ ստեղծում է սարսափելի հուզական վիճակ. «Իշխանական պատգամավորը բարձր ամբիոնից խոսում է զոհվածների թվի մասին,որն այդպես էլ չի հաստատվում, իշխանության հետ առնչություն ունեցող լրատվականների միջոցով հստակ թվեր են հրապարակվում, արդյունքում ստեղծվում է խառնաշփոթ և անորոշ վիճակ: Հանձնաժողովի նախագահը պետք է արտահերթ նիստ կազմակերպեր և այս հարցերը քննարկեր, կամ արատագնա նիստ կազմակերպեր առաջնագիծ, բայց ՊՆ-ն և ԳՇ-ն միչև հիմա մեր դիմումներին մերժումով են պատասխանում, այսպիսի մթնոլորտում գալ և նորից հանձնաժողովի փոխնախագահի հարցը քննարկելը՝ տարօրինակ է»,-ասաց Գեղամ Մանուկյանը:

ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն էլ արձագանքեց, որ այս ընթացքում հանձնաժողովի անդամները եղել են առաջնագծում և ակտիվորեն համագործակցում են պաշտպանական և անվտանգային ոլորտների կառույցների հետ.

«Լավ կլինի, ինքներդ էլ լինեք նախաձեռնող և ավելի շատ ընդգրկված լինեք աշխատանքներում»,-ասաց Անդրանիկ Քոչարյանը:

Աղբյուր` Փաստինֆո