Փաստ ինֆո

Եթե եռակողմ հայտարարության 9-րդ կետի մեջ նշված անարգել երթևեկություն ասվածը նշանակեր սուվերեն միջանցք, գրված կլիներ այդպես, մանավանդ, որ այդ նույն փաստաթղթում միջանցք բառն օգտագործված է՝ Լաչինի միջանցքի մասով։ Փաստաթղթում գրված է, որ Լաչինի միջանցքը գտնվում է Ռուսաստանի վերահսկողության տակ: Այս մասին մամուլի ասուլիսի ժամանակ ասաց Նիկոլ Փաշինյանը:

Նիկոլ Փաշինյանը հիշեցրեց, որ Հայաստանի, Ռուսաստանի և Ադրբեջանի փոխվարչապետերի մասնակցությամբ եռակողմ աշխատանքային խումբն արձանագրել է՝ Հայաստանի և Ադրբեջանի միջև վերագործարկվող ճանապարհները գործելու են երկրների սուվերենության և տարածքային ամբողջականության շրջանակներում, այսինքն՝ ճանապարհը պետք է լինի տվյալ երկրի սուվերենության ներքո և ճանապարհների օգտագործումը պետք է տեղի ունենա պարիտետային սկզբունքով.

«Աշխատանքային մակարդակով մենք երբեք Ադրբեջանից միջանցք արտահայտություն չենք լսել: Եռակողմ աշխատանքային խմբում արձանագրվել է, որ միջանցք չկա: Ինչո՞ւ մեզ համար պետք է ընդունելի լինի այն, ինչը չկա, ինչո՞ւ մենք դա պետք է ընդհանրապես քննարկենք, մեկը կարո՞ղ է մեզ բացատրել: Այստեղ է, որ Ադրբեջանի շանտաժի քաղաքականությունն աշխատում է՝ անունը դրել են Զանգեզուրի միջանցք, և ասում են՝ եթե դուք միջանցք չտաք, մենք պատերազմով այդ այն կստանանք: Մենք այս փաստը պետք է դնենք միջազգային հանրության առջև, և պետք է սա ի ցույց դնենք որպես Ադրբեջանի բացահայտ ագրեսիվ քաղաքականություն, որը պետք է համարժեք միջազգային գնահատականի արժանանա»,-ասաց Փաշինյանը:

Նա նաև հայտարարեց, որ Հայաստանը շահագրգռված է տարածաշրջանային կոմունիկացիաների բացման հարցով, քանի որ ՀՀ-ն 30 տարի գտնվում է շրջափակման մեջ, իսկ սա, ըստ Փաշինյանի, մեզ համար ապաշրջափակման հնարավորություն է.

«Եթե Հայաստանն ասում է, որ պատրաստ է ապահովել Նախիջևանի և Արևմտյան Ադրբեջանի միջև ճանապարհ, ապա Հայաստանն է որոշում՝ ինչ ճանապարհով է ապահովում այդ հաղորդակցությունը, հակառակ դեպքում՝ ի՞նչ սուվերենություն, Ադրբեջանն ուզում է որոշել՝ ինչպես մտնի մեր տարածք և ինչպես դուրս գա, չի լինելու այդպիսի բան»,-ասաց նա:

Նիկոլ Փաշինյանը կրկին նշեց, որ Ադրբեջանը ՀՀ տարածքով պետք է ավտոմոբիլային և երկաթուղային ճանապարհ ստանա դեպի Նախիջևան.

«Տվյալ դեպքում Նախիջևանի մասին չէ իրականում խոսքը, այլ ՝ Թուրքիա-Ադրբեջան կապի մասին։ Խոսքը մեծ միջազգային ճանապարհի մասին է, կարծում եմ, որ այստեղ էլ Հայաստանը շահագրգռվածություն ունի, որ միջազգային մեծ ճանապարհն անցնի իր տարածքով»,-ասաց նա:

Նիկոլ Փաշինյանը նաև նշեց, թե չի հասկանում՝ ինչո՞ւ Հայաստանը պետք է հրաժարվի ճանապարհ տալ Ադրբեջանին և Թուրքիային.

«Այսօր աշխարհում երկրները պայքարում են մեկ բանի համար, որ ճանապարհներն անցնեն իրենց տարածքով, որ երկաթուղիները, նավթամուղերը և գազամուղերն անցնեն իրենց տարածքով, բեռները ևս հնարավորինս շատ անցնեն իրենց տարածքով: Ավելին՝ մենք ասում ենք, որ շահագրգռված ենք, որ Թուրքիայի երկաթուղին բացվի, և խոսքը լինի ոչ միայն Հայաստան-Ադրբեջան երկաթուղու մասին՝ նկատի ունեմ՝ Նախիջևան-Մեղրի-Հորադիզ երկաթուղին, այլ ուզում ենք, որ Կարս-Գյումրի երկաթուղին ևս բացվի և ավելի մեծ կոնտեքստ ստանա, որից Հայաստանը նույնպես օգտվի: Այսինքն՝ ոչ միայն երկաթուղային կապ ստանա դեպի Ռուսաստան և Եվրոպա, այլ երկաթուղային կապ ստանա նաև Իրանի հետ»,-ասաց Փաշինյանը:

Ըստ նրա՝ Ադրբեջանը սա հասկանում է և դրա համար էլ անընդհատ փորձ է անում Հայաստանի ներսում նյարդային մթնոլորտ ստեղծել, որպեսզի այնպիսի տպավորություն ստեղծվի, թե Հայաստանն ինքն իր ապաշրջափակմանը դեմ է արտահայտվում.

«Այսօր Ադրբեջանն օգտագործում է Հայաստանում որոշ ուժերի՝ չգիտեմ որտեղից հրահրվող տրամադրությունները, որ պետք է ճանապարհ չտանք, որևէ մեկը կարո՞ղ է բացատրել, ինչո՞ւ չպետք է ճանապարհ տանք: 30 տարի միջազգային բոլոր ատյաններում Հայաստանի բողոքն ընդդեմ Ադրբեջանի եղել է այն, որ Ադրբեջանը և Թուրքիան Հայաստանի նկատմամբ վարում են շրջափակման քաղաքականություն։  Հիմա պատկերացնու՞մ եք ստեղծվի իրավիճակ, որ Ադրբեջանը և Թուրքիան ասեն՝ մենք ապաշրջափակումը հանում ենք, կոմունիկացիա տալիս ենք, իսկ Հայաստանն ասում է՝ ես ոչ մի դեպքում ճանապարհ չեմ տա, սա աբսուրդ է»,-ասաց Փաշինյանը:

Նա վստահեցրեց, որ Ադրբեջանն է զարգացնում միջանցքային տրամաբանություն, սակայն իրականում՝ չկա միջանցքի հարց, այն ուղղակի գոյություն չունի:

Աղբյուր` Փաստինֆո