Փաստ ինֆո

Պատմության ուսուցչին մեղադրանք է առաջադրվել՝ դասաժամին աշակերտների ներկայությամբ՝ իբր, Նիկոլ Փաշինյանի և նրա ընտանիքի անդամների նկատմամբ բռնություն գործադրելու հրապարակային կոչեր կատարելու համար:

«Փաստինֆո»-ի հաղորդմամբ` ուսուցիչն աշխատում է Երեւանում, Գայի անվան թիվ 129 հիմնական դպրոցում:  Ըստ նախաքննական մարմնի,  պատմության ուսուցիչը համաձայն չի եղել  ՀՀ վարչապետ Նիկոլ Փաշինյանի վարած քաղաքականության հետ և  2021 թվականի մայիսի 21-ին՝  7-րդ դասարանի պատմության դասաժամին, աշակերտների ներկայությամբ, իբր, հանդես է եկել  ՀՀ վարչապետ Նիկոլ Փաշինյանի և նրա ընտանիքի անդամների նկատմամբ բռնություն գործադրելու հրապարակային կոչերով, այն է՝ հայտարարել է, որ Նիկոլ Փաշինյանին պետք է սպանել, նրան և նրա ընտանիքին պետք է հրապարակում վառել:

Ուսուցչին մեղադրանք է առաջադրվել ՀՀ քրեական օրենսգրքի 226,2-րդ հոդվածի 2-րդ մասի 2-րդ կետի հատկանիշներով, նրա նկատմամբ որպես խափանման միջոց է ընտրվել ստորագրությունը՝ չհեռանալու մասին:

Քրեական գործը դատարան մուտք է եղել նոյեմբերի 3-ին և նույն օրը մակագրվել Երևանի ընդհանուր իրավասության դատարանի դատավոր Մնացական Մարտիրոսյանին:

Դատարանը նոյեմբերի 4-ին վարույթ է ընդունել քրեական գործը և դատական նիստը նշանակել նոյեմբերի 24-ին՝ ժամը 17,00-ին:

Աղբյուր` Փաստինֆո