Փաստ ինֆո

«Փաստ» օրաթերթը գրում է.  «Վերջին օրերին «Փաստին» դիմում են մարտական գործողությունների մասնակից ուսանողները, նրանց ծնողները՝ ուսման վարձավճարների զեղչերի կամ փոխհատուցման հարցով: Հիմնական խնդիրն այն է, որ շատերը տարակուսանքի մեջ են, թե ի՞նչ սկզբունքով են զեղչվում իրենց վարձավճարները, ե՞րբ է հաշվի առնվում ՄՈԳ-ը և մի շարք այլ հարցեր: Պարզաբանման համար դիմեցինք ԿԳՄՍ նախարարությանը: Նշեցին, որ իրենց պաշտոնական կայքում խնդրին վերաբերող հրապարակումներ կան, որոնք կտան մեզ հուզող բոլոր հարցերի պատասխանները: Եվ այսպես՝ ամեն ինչի մասին ըստ հերթականության: 2020 թ.-ի դեկտեմբերի 10-ին կառավարության նիստում որոշում է կայացվել, որ պետությունը 100 տոկոս փոխհատուցում կտրամադրի 44-օրյա պատերազմի մասնակից ուսանողներին և մարտական գործողությունների մասնակիցների ուսանող զավակներին, կնոջը կամ ամուսնուն:

Այսպիսով՝ աբողջությամբ փոխհատուցվել է 2020 թ. առաջին կիսամյակի ուսման վարձավճարը: Հաջորդիվ՝ 2021 թ.-ի օգոստոսին ԱԺ-ն երկրորդ ընթերցմամբ և ամբողջությամբ ընդունել է ««Բարձրագույն և հետբուհական մասնագիտական կրթության մասին» օրենքում փոփոխություն և լրացում կատարելու մասին» կառավարության հեղինակած օրենքի նախագիծը՝ կից փաթեթով: Պետության կողմից ֆինանսական աջակցություն տրամադրելու համար օրենքում ավելացվել էին սովորողների առանձին խմբեր՝ մարտական գործողություններին մասնակցած, սահմանված կարգով առկա ուսուցմամբ բակալավրի կամ ինտեգրացված կրթական ծրագրով ընդունված երկու և ավելի անչափահաս երեխա ունեցող ուսանողներ։ Այս տարվա սեպտեմբերի 14-ին ԿԳՄՍ-ն տեղեկացրել էր, որ պատերազմի մասնակից ուսանողները և այլ սոցիալական խմբերը կշարունակեն ստանալ ուսման վարձի զեղչ նոր կարգով: Նախարարությունը հիշեցրել էր՝ ուսվարձի փոխհատուցումը շարունակական դարձնելու և այն որպես սովորողի հիմնական իրավունք ամրագրելու նպատակով կառավարության նախաձեռնությամբ փոփոխություններ և լրացումներ են կատարվել «Բարձրագույն և հետբուհական մասնագիտական կրթության մասին», «Նախնական մասնագիտական (արհեստագործական) և միջին մասնագիտական կրթության մասին», «Կրթության մասին» օրենքներում:

Օրենսդրական փոփոխություններն ուժի մեջ են մտել այս տարվա օգոստոսի 16-ին: Ըստ այդմ, կառավարությունը պետք է ընդուներ համապատասխան կարգ, որով ուսհաստատություններում սովորողների առանձին խմբեր կօգտվեին ուսման վարձի լրիվ կամ մասնակի զեղչերից՝ ըստ առաջադիմության, այսինքն՝ ուսման վարձի զեղչից օգտվելու համար պետք է ապահովեն ՄՈԳ-ի որոշակի շեմ, իսկ վարձավճարի զեղչը կավելանա ՄՈԳ-ի ցուցանիշի բարձրացմանը զուգահեռ: Այսպիսով՝ կառավարության հոկտեմբերի 28ին կայացած նիստում որոշում է կայացվել փոփոխություններ կատարել բարձրագույն ուսումնական հաստատություններում ուսանողական նպաստ և պետական կրթաթոշակ տալու կարգում:

Ըստ որոշման, սոցիալական աջակցություն ստացող սահմանամերձ համայնքների, մարտական գործողություններին մասնակցած ուսանողներին, առկա ուսուցմամբ բակալավրի ու անընդհատ և ինտեգրացված կրթական ծրագրերով ընդունված երկու և ավելի անչափահաս երեխա ունեցող ուսանողների խմբերին փոխհատուցում կտրամադրվի հետևյալ կերպ. Առաջին կուրս ընդունված ուսանողներին՝ բակալավրի ու ինտեգրացված կրթական ծրագրերով համապատասխան մասնագիտության համար սահմանված ընդունելության քննությունների արդյունքների հիման վրա՝ տարեկան ուսման վճարի 50 տոկոսի չափով, իսկ մագիստրոսի կրթական աստիճանի դեպքում՝ նախորդ կրթական աստիճանի ՄՈԳ-ի 60 տոկոսը հաղթահարած ուսանողներին՝ տարեկան ուսման վճարի 50 տոկոսի չափով: Հաջորդ կուրսերում՝ նախորդ ուստարվա արդյունքներով ՄՈԳ-ի առավելագույն արժեքի 6070 տոկոս ունեցող ուսանողներին՝ տարեկան ուսման վճարի 50 տոկոսի չափով, ՄՈԳ-ի առավելագույն արժեքի 71-79 տոկոս ունեցող ուսանողներին՝ տարեկան ուսման վճարի 60 տոկոսի չափով, ՄՈԳ-ի առավելագույն արժեքի 80 տոկոս և բարձր ՄՈԳ ունեցող ուսանողներին՝ տարեկան ուսման վճարի 70 տոկոսի չափով»:

Հոդվածն ամբողջությամբ կարող եք կարդալ «Փաստ» թերթի՝ 20.11.21թ համարում։

Աղբյուր` Փաստինֆո