Փաստ ինֆո

Մեր քաղաքացիները գտնվում են գերեվարված վիճակում։ Վարչապետի առաջին խնդիրն է քաղաքացիներին հետ վերադարձնել հայրենիք, ի՞նչ է նշանակում քննություն պետք է իրականացնենք։ ԱԺ ճեպազրույցների ժամանակ այս մասին ասաց «Հայաստան» խմբակցության քարտուղար Արծվիկ Մինասյանը։

«Լավ է չես ասում՝ Ալիև մի հատ քննություն արա, հետո ուղարկիր։ Դրանով արդարացնում ես, որ Ադրբեջանի դատարանները պատիժներ են սահմանե՞լ մեր քաղաքացիներին։ Դա ե՞նք արդարացնում, թե՞ այս գլխից հայտարարում եք, որ մեր քաղաքացիների հետևից չեք գնալու»,-ասաց Արծվիկ Մինասյանը։

Դիտարկմանը, որ Նիկոլ Փաշինյանն օրեր առաջ հայտարարել էր, թե սահմանազատում և սահմանագծում չեն կարող իրականացնել քանի դեռ սահմանում լարված է իրավիճակը, սակայն երեկ կառավարության նիստում նշեց, որ իրեն առաջարկվել է 3 տարբեր, որոնք իր համար ընդունելի են, «Հայաստան» խմբակցության պատգամավոր Ագնեսա Խամոյանը նկատեց՝ Սյունիքում ադրբեջանական կողմի ագրեսիային զուգահեռ խորհրդարանում իշխանական պատգամավորները հակառուսական հայտարարություններ էին անում, իսկ դրա հաջորդ օրը Նիկոլ Փաշինյանը հայտարարում է, որ ՌԴ ՊՆ-ի կողմից 3 առաջարկ է եղել, որոնք ընդունելի են։

«Ինձ մոտ տպավորություն է, որ իրականացվում է 44-օրյա պատերազմի սցենարը, որի ավարտին Նիկոլ Փաշինյանը հայտարարեց, որ փրկել է 25-30 հազար զինվորի կյանք ու այդկերպ փորձեց խաղաղությունը վաճառել հասարակության վրա։ Նույնը տեղի ունեցավ վերջին մի քանի օրվա ընթացքում։ Նորից ունեցանք տարածքային կորուստներ, նաև մարդկային կորուստներ։ Այս պահի դրությամբ չգիտենք, թե վերջնականապես քանի գերեվարված անձ ունենք։ Նիկոլ Փաշինյանը, որը հայտարարում էր, թե այս լարված իրավիճակում սահմանագծում ու սահմանազատում չի իրականացնելու, հայտարարում է, որ իր համար ընդունելի են Ռուսաստանի առաջարկները։ Ակնհայտ է, որ այս լարված իրավիճակում, երբ մարդիկ պատրաստ են ամեն ինչի, միայն թե խաղաղություն լինի, փորձեց մատուցել այն պայմանավորվածությունները, որոնք ձեռք է բերել ժողովրդի թիկունքում»,-ասաց Ագնեսա Խամոյանը։

Աղբյուր` Փաստինֆո