Փաստ ինֆո

Երևանի ընդհանուր իրավասության դատարանում՝ դատավոր Տաթևիկ Գրիգորյանի նախագահությամբ, այսօր մեկնարկից անմիջապես հետո հետաձգվել է սյունեցիներին աջակցելու համար ՀՀ գլխավոր դատախազության շենքի դիմաց իրականացված բողոքի ակցիայի գործով առաջին դատական նիստը։

«Փաստինֆո»-ի թղթակցի հաղորդմամբ՝ դատական նիստի մեկնարկից րոպեներ առաջ Բագրատ Եսայանը լրագրողների հետ զրույցում հայտնեց, որ չի հասկանում, թե ինչու է ներգրավված սույն գործով, մեղքի որևէ անհատականացում չկա, պարզապես՝ մեկ ոստիկան քրեական գործի հարուցումից ամիսներ անց հիշել է, թե տեսել է իրեն՝ Նիկոլ Փաշինյանի վերաբերյալ հայհոյանք վանկարկելիս։

Նրա փոխանցմամբ՝ 79 էջանոց մեղադրական եզրակացությունում հիմնականում նշված է, թե իբրև ինքը գոռացել է մի արտահայտություն, մինչդեռ, Եսայանը նշեց, որ սովորություն չունի հասարակության մեջ նման արտահայտություններ անելու, ինքը չի գոռացել, բայց դա չի նշանակում, որ ինքը համաձայն չէ այդ գնահատականի հետ։ Բացի այդ՝ Եսայանը գտնում է, որ պետք է պարզել՝ արդյո՞ք վանկարկումն իսկապես սեռական բնույթի հայհոյանք է, թե ոչ, հետևաբար, հետագայում Եսայանը կմիջնորդի՝ բանասերներ որպես փորձագետ ներգրավելու մասին։

Հիշեցնենք, որ 2021թ ապրիլին Սյունիքի մարզ կատարած այցի ընթացքում բողոքի ակցիա է իրականացվել՝ ընդդեմ Նիկոլ Փաշինյանի։ Ակցիայի մասնակիցները խոչընդոտել են Նիկոլ Փաշինյանի մուտքը՝ Սյունիքի մի շարք բնակավայրեր, «ողջունել» Փաշինյանին, ինչից հետո ակցիայի մի շարք մասնակիցներ ձերբակալվել են։ Ի աջակցություն ձերբակալված սյունեցիների մի շարք քաղաքացիներ հավաքվել են ՀՀ գլխավոր դատախազության շենքի մոտ և բողոքի ակցիա իրականացրել, ձվեր նետել դատախազության շենքի մոտ։

Սույն քրեական գործով մեղադրյալները տասն են՝ Արսեն Վարդանյանը, Էմանուել Սինանին, Նարեկ Վերդյանը, Արշակ Սարգսյանը,  Սարգիս Կարապետյանը, «Հայաստան» խմբակցության պատգամավոր, ՀՅԴ-ական գործիչ Գեղամ Մանուկյանի որդին՝ Տարոն Մանուկյանը, Մեսրոպ Եղիազարյանը, Աշոտ Հովհաննիսյանը, հասարակական-քաղաքական գործիչ Բագրատ Եսայանը, Նարեկ Մանթաշյանը։ Վերջիններս մեղադրվում են խուլիգանություն կատարելու մեջ, ըստ մեղադրանքի՝ վերջիններս խախտել են հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով:

Այսօր սույն գործով նշանակված էր առաջին դատական նիստը, սակայն ամբաստանյալներից երեքի բացակայության պայմաններում այն հետաձգվեց, վերջիններս պատշաճ ծանուցում չեն ստացել։

«Փաստինֆո»-ի թղթակցի հաղորդմամբ՝ մինչ դատական նիստը կհետաձգվեր, Բագրատ Եսայանը հայտնեց, որ միջնորդություն կներկայացվի՝ առողջական վիճակով պայմանավորված երկրից բացակայելու թույլտվություն ստանալու վերաբերյալ։ Դիմումը դատարանը նիստի շրջանակներում չի քննարկի։

Հաջորդ դատական նիստը նշանակվել է դեկտեմբերի 8-ին, ժամը՝ 11.30-ին։

Հեղինակ՝ Իզաբել Սահակյան

Աղբյուր` Փաստինֆո