Փաստ ինֆո

Նոյեմբերի 16-ին Սյունիքում ադրբեջանական ագրեսիայի հետևանքով զոհված կրտսեր սերժանտ Արթուր Մարտիրոսյանը Լոռու մարզի Անտառամուտ գյուղից էր։ 

Պարտադիր ժամկետային ծառայությունն անցկացրել էր Մատաղիսում, այնուհետև մեկ տարով մեկնել արտագնա աշխատանքի։ Հայաստան վերադառնալուց հետո որոշել էր անցնել պայմանագրային ծառայության։

Անտառամուտի գյուղապետ Արայիկ Գևորգյանը հիշում է՝ 23-ամյա Արթուրը պարտաճանաչ էր, պատասխանատու, բարի։

«Փաստինֆո»-ի հետ զրույցի ժամանակ Արայիկ Գևորգյանն ասաց, որ Արթուրը բնակվում էր հոր, մոր և մեծ եղբոր հետ. «Շատ խելոք ընտանիք ունի։ Մի քիչ վատ են ապրում, անասնապահությամբ են զբաղվում։ Երկու քույր էլ ունի, որոնք ամուսնացած են։ Եղբորս տղայի ընկերն էր, մեր տուն էլ էր գնում-գալիս։ Շատ լավ տղա էր, բոլորին հարեհաս։ Գյուղի, ժողովրդի համար ինչ գործ լիներ, անում էր։ Խոսեց հետս, ասաց, որ ուզում է մյուս տարի ամուսնանա»,-նշեց գյուղապետը։

Արթուրը մասնակցել էր նաև 44-օրյա պատերազմին, վիրավորում ստացել, բայց վերականգնվելուց հետո անմիջապես հետ էր գնացել պատերազմի դաշտ։ Արայիկ Գևորգյանը նշում է՝ երկար չէր բացակայել ծառայությունից։

Վերջին անգամ ծնողներն Արթուրի հետ խոսել են նախքան ռազմական գործողությունները. «Ցերեկը խոսել են, հետո արդեն նրա հեռախոսն անհասանելի է եղել, էլ չեն կարողացել կապի դուրս գալ իր հետ»,-նշեց գյուղապետը։

Հիշեցնենք, որ Ադրբեջանը նոյեմբերի 16-ին հայ-ադրբեջանական սահմանի արևելյան հատվածում հերթական ագրեսիան իրականացրեց։

Թշնամու ագրեսիայի հետևանքով հայկական կողմը կորցրել է 2 մարտական դիրք։ Այս պահի դրությամբ հայկական կողմը պաշտոնապես հաստատված 6 զոհ, 13 գերի և 24 անհետ կորած ունի։

Աղբյուր` Փաստինֆո