Փաստ ինֆո

«Փաստինֆո»-ն այսօր անդրադարձել էր նոյեմբերի 16-ի ադրբեջանական ագրեսիայի հետեւանքով նահատակված Տարոն Սահակյանին, որի մարմինը Հայաստան է տեղափոխվել Բաքվից՝ հատուկ չվերթով։ «Տարոն Սահակյանին հրամայել են ազատ արձակել գերեվարված ադրբեջանցիներին ու ինքն է գերևարվել. Նրան Բաքվում խոշտանգելով սպանել են. սպան ամուսնացած էր, ուներ մեկ որդի» վերտառությամբ հոդվածում ներկայացվել էր տեղեկատվություն՝ հայ սպայի մասին եւ նրա մահվան հանգամանքների վերաբերյալ ստացված տեղեկատվություն առ այն, որ նա սպանվել է գերության մեջ։

Նշենք, որ այս մասին հոդվածի մեջ ներառվել էր երկու աղբյուրից ստացված տեղեկություն՝ ազգակցական կապ ունեցող հարազատից և Կողբ համայնքի նախկին ղեկավարից, որտեղ և ապրել է հերոսը։ Ընդ որում՝ «Փաստինֆո»-ն հրապարակել է նաեւ համայնքապետի հետ հեռախոսազրույցի ձայնագրությունը։ Հրապարակումը բավական մեծ աղմուկ է բարձրացրել, որից հետո համայնքապետը կապ հաստատեց «Փաստինֆո»-ի հետ, նշելով, որ խնդրում է իր անունից հրապարակել իր կողմից տրամադրած տեղեկության հերքում։

«Ես ձեզ խնդրում եմ նյութին հերքում տալ։ Այնտեղ փաստորեն լրիվ ուրիշ բան է տեղի ունեցել։ Փաստորեն ոչ մի հետք չկա, խոսում էի նաև Տարոնի հայրիկի հետ։ Լուրերը իմ կողմից հերքեք, որ սխալ տեղեկություն է եղել, խոշտանգված չի եղել, ինքը փաստորեն չի էլ գերեվարվել։ Իրենց պատմելով լրիվ ուրիշ ձև է եղել, գերեվարում չի եղել։ Ասացին ապատեղեկատվություն է եղել։ Աճյունը բերել են, ես պետք է դիմավորեմ։ Դիակը խոշտանգված չէ, ընկերներս այնտեղ են, զանգեցին ասացին, որ այդպես չէ, կխնդրեի հերքեք»,- ասաց Կողբի համայնքապետ Արսեն Աղաբաբյանը։

«Փաստինֆո»-ի հետ կապ էր հաստատել նաև Ռոման Սահակյանը, պնդելով, որ եղբոր՝ Տարոնի դին խոշտանգված չէ, եղբայրն անգամ գերեվարված չի եղել։ «Փաստինֆո»-ն հարգելով հերոս նահատակի հիշատակը, հրապարակում է նաև հերոսի եղբոր հերքումը։

«Մարմինը խոշտանգված, անճանաչելի չէ, իր մարմնին ոչինչ չկա, բեկորային վնասվածք ունի սրտի հատվածում»,- նշել է Ռոմանը։

Նոյեմբերի 16-ի էսկալացիայից անցել է երկու օր, սակայն ՀՀ իշխանությունները պաշտոնական տեղեկատվություն չեն տրամադրում ադրբեջանական ագրեսիայի հետեւանքով զոհված, վիրավորված, գերեվարված հայորդիների մասին։ Նիկոլ Փաշինյանի ընտանիքին պատկանող կայքը հրապարակել էր 10 զոհի, ԱԺ արտաքին հարաբերությունների հանձնաժողովի նախագահը 15, իսկ ՀՀ ՊՆ-ն մեկ զոհի մասին, ընդ որում՝ պարզ չէ Ն.Փաշինյանի կայքը ու քպական պաշտոնյան տարածել են կեղծ տեղեկատվություն, թե ոչ. ՊՆ-ն չի հերքում, սակայն շտապում են հերքել ադրբեջանցիների էությունը ներկայացնող հրապարակումը,  թե, իբր, նրանք գերության մեջ զինվորին չեն սպանել, այլ այնքան «հումանիստ են» գտնվել, որ հայ սպայի մարմինն իրենց հետ տարել են Բաքու, որ Մուրադովն անձամբ մեկնի ու հատուկ չվերթով աճյունը տեղափոխի հայրենիք։

Ի դեպ, նույն պետական մարմինները հերքում էին նաեւ ադրբեջանական վայրագությունների մասին պատմող ՀՀ ՄԻՊ-ի զեկույցը, թե ինչպես են խոշտանգվել ու անմարդկային վերաբերմունքի արժանացել մեր տղաները։

«Փաստինֆո»-ն գործել է բարեխիղճ, ընթերցողին փոխանցել մտահոգիչ տեղեկատվություն՝ իրականության վերաբերյալ։ Միաժամանակ ուզում ենք արձանագրել, որ հասկանում ենք Կողբի համայնքապետին, որը իր վրա վերցնելով պատասխանատվությունը նշել է, թե  ինքն է սխալ տեղեկատվություն տրամադրել։

Հասկանում ենք նաեւ  նահատակված հերոսի ընտանիքի անդամներին, որոնցից երկուսն այսօր էլ զինվորական են...

Հասկանում ենք, բայց....

Վստահ ենք, որ խնդրահարույց հարցերի պատասխաններն, ի վերջո, կտրվեն. այս իշխանությունները հավերժ չեն ու իրավական պետություն, իրոք, մի օր կունենանք։

Աղբյուր` Փաստինֆո