Փաստ ինֆո

Օդանավակայանի տաքսիների գործունեությանն առնչվող օրենսդրական կարգավորումների նախագիծը ներկայացնելիս՝ ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանը դժգոհեց, որ ընդդիմադիր պատգամավորները չեն մասնակցում ԱԺ նիստերին՝ բոյկոտելով նիստերը.

«Մեր ընդդիմադիր գործընկերները երկու-երեք օր է՝ չեն մասնակցում ԱԺ նիստերին, այս վարքագիծն անթույլատրելի է։ Ես հասկանում եմ քաղաքական բոյկոտի իմաստը, բայց կոնկրետ հանձնաժողովներում անթույլատրելի է աշխատանքները ձախողման տանելը»,-ասաց ՔՊ-ական պատգամավորը:

Բաբկեն Թունյանը նշեց, որ երեկ ԱԺ տնտեսական հարցերի հանձնաժողովի արտահերթ նիստ պետք է լիներ, սակայն նիստը չի կայացել, քանի որ հանձնաժողովի նախագահ Վահե Հակոբյանը ներկա չէր.

«Այնպես է ստացվել՝ մենք ունենք հանձնաժողովի նախագահ, բայց վերջին ժամանակներում հիմնականում մեր սեփական ուժերով ենք աշխատում: Անկախ քաղաքական նախապատվություններից՝ հանձնաժողովները պետք է լինեն մաքսիմալ մասնագիտական և հնարավորինս չեզոք դիրքերի վրա հիմնված»,-ասաց Թունյանը:

Պատգամավորը կոչ արեց ընդդիմությանը՝ վերանայել իրենց որոշումը, այլապես դա կդիտվի աշխատանքային պարտականությունների չկատարում՝ իր հնարավոր հետևանքներով հանդերձ:

Աղբյուր` Փաստինֆո