Փաստ ինֆո

«Փաստինֆո» լրատվական գործակալությունը պահանջում է քննության առարկա դարձնել և քրեաիրավական գնահատական տալ «Բաղրամյան26» տելեգրամյան ալիքի իրական տերերի գործողություններին՝ շանտաժի լեզվով լրատվամիջոցին վարկաբեկելու, ազատ խոսքը ճնշելու համար։

Ադրբեջանի կողմից ՀՀ տարածքային ամբողջականության դեմ սանձազերծված ագրեսիային պատշաճ չարձագանքելու, քաղաքական ու ռազմական ղեկավարության կողմից ՀՀ ազգային շահերից չբխող գործողություններ կատարելու վերաբերյալ «Փաստինֆո»-ն անցած մեկ տարվա ընթացքում բազմիցս հանդես է եկել փաստարկված հրապարակումներով։ Դատախազությունը մեր հարցումներին ի պատասխան հավաստել է, թե ՀՀ տարածքային ամբողջականության դեմ ՀՀ առանձին պաշտոնյաների կողմից կատարված գործողությունների մասին ահազանգերը քննության առարկա են ՀՔԾ-ում, սակայն առ այսօր դրանց իրավական գնահատական չի տրվել եւ պատշաճ քննություն իրականացնելու փոխարեն ոմանք տելեգրամյան նշված ալիքի միջոցով փորձում են վարկաբեկել, ճնշել «Փաստինֆո»-ին՝ զերծ մնալու ՀՀ ազգային շահերին վերաբերող հրապարակումներից։

Մասնավորապես՝ օրեր առաջ «Փաստինֆո»-ի եթերում փորձագետը հայտարարել էր, որ ՀՀ ԶՈՒ զինվորները գերեվարել են 6 ադրբեջանցու, սակայն հրաման է տրվել նրանց ազատ արձակել, իսկ այսօր մեկ այլ աղբյուրից էր ստացվել նույնաբովանդակ տեղեկատվություն՝ վրդովմունք հայտնելով, որ հայ սպային է պարտադրվել նրանց ազատ արձակել, որի մարմինը նոյեմբերի 18-ին Մուրադովը Բաքվից տեղափոխել է Երեւան։ Սպան նահատակվել է ադրբեջանական ագրեսիայի հետեւանքով՝ գերության մեջ, ինչպես, ի սկզբանե, ասել էին «Փաստինֆո»-ի զրուցակիցները։ Արդյունքում մեծ գրոհ սկսվեց «Փաստինֆո»-ի նկատմամբ՝ մեղադրելով ադրբեջանական պրոպագանդիստ լինելու մեջ։

Արցախյան երրորդ պատերազմի ընթացքում 44 օր շարունակ հանրությանը կեղծ տեղեկություններ մատուցած սույն տելեգրամյան ալիքն ու նրա տերերը հանդգնում են բացահայտ շանտաժի ենթարկել լրատվամիջոցին՝ ըստ էության սպառնալով մեղադրել ծանր հանցագործության մեջ՝ իշխանական՝ ազգադավ քարոզչության շրջանակների մեջ չտեղավորվող տեղեկատվություն տարածելու համար։

Պահանջում ենք, որ ՀՀ գլխավոր դատախազությունը պարզի «Բաղրամյան 26»-ի իրական տերերին ու պատասխանատվության ենթարկի՝ լրատվամիջոցին շանտաժի ենթարկելու, առանձնապես ծանր հանցագործության մեջ մեղադրելու համար։

Միաժամանակ խոստովանում ենք, որ այսօրվա դատախազությունից ակնկալիքներ չունենք, բայց լիահույս ենք, որ ի հեճուկս ոմանց իրավական պետություն, ի վերջո, կունենանք ու հետամուտ կլինենք, որպեսզի մեղավորների ինքնությունը պարզվի ու կանգնեն արդարադատության առաջ։

Ի դեպ, «Փաստինֆո»-ին կեղծ տեղեկություններ տարածելու մեջ մեղադրելու փորձ կատարել է մեկ էլ Սյունիքի մարզպետը, որը նախ «Փաստինֆո»-ի հետ զրույցում հերքել էր Սեւ լճի հատվածում ադրբեջանցիների առաջանալու մասին լուրը՝ ասելով, թե «հակառակորդը առաջ չի եկել, այլ մոլորվել է», ապա բարձրացված աղմուկի արդյունքում ոչ թե ներողություն խնդրել կեղծ տեղեկատվություն տարածելու համար, այլ լրատվամիջոցին մեղադրել իր խոսքերը աղավաղելու մեջ։

«Փաստինֆո»-ի բարի համբավը արատավորելու փորձը ձախողվեց թե այն ժամանակ, քանի որ պահպանել էինք մարզպետի հետ հեռախոսազրույցի ձայնագրությունը, թե ձախողված է հիմա, քանի որ «Փաստինֆո»-ն կրկին ունի բոլոր փաստերը։

Բարի խորհուրդ՝ հեռու մնացեք «Փաստինֆո» լրատվականից։

Աղբյուր` Փաստինֆո