Փաստ ինֆո

Վարչապետի խնդիրը չէ խոսել այն մասին, թե զինվորներն ինչպես են գերության մեջ հայտնվել։ Վարչապետի կարևոր գործառույթը քաղաքացիների իրավունքները պաշտպանելն է և այս դեպքում նրանց հայրենիք վերադարձնելը։ «Փաստինֆո»-ի հետ զրույցի ժամանակ ասաց ՀՀ առաջին մարդու իրավունքների պաշտպան Լարիսա Ալավերդյանը՝ անդրադառնալով ՀՀ վարչապետ Նիկոլ Փաշինյանի ԱԺ ելույթին։

Հիշեցնենք, որ երեկ ԱԺ-ում կառավարության անդամների հետ հարցուպատասխանի ժամանակ Նիկոլ Փաշինյանը հայտարարել էր, որ կարծում է՝ ժամանակն է, որ գերեվարման յուրաքանչյուր դեպք պատշաճ ձևով հետաքննեն։

«Պետք է քննվեն դեպքերը։ Ի՞նչ է նշանակում գերի ընկնել, ի՞նչ հանգամանքներում։ Զինվորական կանոնագրերը հստակ սահմանում են, թե որ դեպքում է, որ գերի ընկնելը չի համարվում հանցագործություն»,-նշել էր Նիկոլ Փաշինյանը։
Լարիսա Ալավերդյանը նկատում է՝ վարչապետի նման հայտարարությունները գռեհիկ ուղղորդում են։

«Այն պահին, երբ խոսում ենք, որ անհասկանալի պատճառներով և պայմաններում են տեղի ունենում թշնամու գործողությունները, վարչապետը ժամ առաջ ուզում է ամեն ինչի մեղքն ուղղակի դնի այն զինվորների վրա, որոնք գերեվարված են»,-ասաց Լարիսա Ալավերդյանը։

Վերջինս ընդգծեց, որ միջազգային հումանիտար իրավունքը պահանջում է՝ երկիրը նախևառաջ պետք է հոգա գերիների վերադարձի հարցը, իսկ թե հետո ինչ կպարզվի, արդյոք կպարզվի, որ գերեվարվել են, քանի որ պատշաճ կառավարում տեղի չի ունեցել, դա բոլորովին այլ հարց է։

«Նման բաներ հայտարարելն աննախադեպ է։ Հայաստանի բոլոր նախկին նախագահները նախևառաջ հոգում էին այն մասին, որ գերիներին վերադարձնեն։ Կյանքի վտանգի ներքո որևէ հայտարարություն չպետք է ընդունվի որպես քրեական գործի հիմք։ Վարչապետի կողմից նման հայտարարությունը քաղաքական առումով գռեհիկություն է։ Ամբողջովին դատապարտում եմ նման հայտարարությունները»,-նշեց Լարիսա Ալավերդյանը։

Հարցին՝ արդյոք հնարավո՞ր է, որ վարչապետի հայտարարությունները հետագայում օգտագործվեն ադրբեջանցիների կողմից՝ ի վնաս գերիների, Լարիսա Ալավերդյանը նկատեց՝ Ադրբեջանն ընդհանրապես տեղ չունի հետ կանգնելու միջազգային հումանիտար նորմերից։ Լարիսա Ալավերդյանն ընդգծում է, որ կապ չունի, թե ինչպես է գերության մեջ հայտնվել զինծառայողը, Ադրբեջանը պարտավոր է գերիներին վերադարձնել, իսկ Հայաստանի իշխանությունը պետք է առաջին հերթին հոգա նրանց առողջական վիճակի մասին։

«Այստեղ ուրիշ հարց կա, երբ երկրից այդպիսի բան է հնչեցվում առաջին դեմքի անունից, վտանգ է ծագում, որ Ադրբեջանը կարող է այլ կերպ օգտագործել դա՝ ասելով, որ ահա ձեզ այնտեղ ինչ է սպասվում, արդյոք համաձա՞յն եք վերադառնալ ձեր երկիր, թե՞ ցանկանում եք գնալ երրորդ երկիր։ Այսինքն՝ դա Ադրբեջանի իշխանությունների կողմից անպայման հասցվելու է գերեվարված անձանց և նրանց վախեցնելու են այդպես»,-ասաց Լարիսա Ալավերդյանը։

Աղբյուր` Փաստինֆո