Փաստ ինֆո

Հակառակորդին երեկ հաջողվեց դիրքերի առաջխաղացում ապահովել, ինչպես նաև վերցնել ռազմավարական նշանակություն ունեցող երկու բարձունք, ինչի հետևանքով Երևան-Գորիս ավտոմայրուղին խոցելիության տիրույթում է հայտնվում։ «Փաստինֆո»-ի հետ զրույցի ժամանակ ասաց ռազմական փորձագետ Հայկ Նահապետյանը։

Նրա խոսքով՝ թշնամին այս պահին իր առջև դրված խնդիրը լուծել է։ Այն է՝ եթե Ադրբեջանը Սյունիքի դեմ լայնածավալ գործողություններ սկսի, ապա այդ մայրուղով, որն, ընդ որում, միակ մայրուղին է, դեպի Սյունիք շարժվող զինտեխնիկան ու շարասյունը խոցելի են դառնալու։
Թե ինչու հայկական կողմին չհաջողվեց այդքան կարևոր բարձունքները պահել, Հայկ Նահապետյանը նշում է, որ դրան ռազմական գերատեսչության ղեկավարները պետք է պատասխանեն։

«Ռազմավարական նշանակություն ունեցող բարձունքների համար օրերով, շաբաթներով կռիվ է լինում, իսկ մենք երեկ երկու բարձունք ենք տվել։ Սրա պատասխանատուները Նիկոլ Փաշինյանը և ռազմական գերատեսչության ղեկավարությունն է»,-նշեց փորձագետը։

Հարցին՝ արդյոք ունեի՞նք անհրաժեշտ ներուժ դիմադրելու և այդ բարձունքները չկորցնելու համար, Հայկ Նահապետյանը նկատեց՝ հակառակորդի առաջխաղացումը կարելի էր կասեցնել, սակայն, նրա կարծիքով, այդ բարձունքները պահելու և հակառակորդի առաջխաղացումը կասեցնելու ռազմական օպերացիա, ըստ երևույթին, չեն իրականացրել։

Դիտարկմանը, որ ԱԽ քարտուղարն ասաց՝ դիմել են ՌԴ-ին, միևնույն ժամանակ էլ խորհրդարանում իշխանական պատգամավորները տարբեր կոչերով դիմեցին ՌԴ-ին, սակայն պաշտոնական գրությամբ այդպես էլ հայկական կողմն առ այս պահը չի դիմել, ինչի մասին հայտարարել է ռուսական կողմը՝ Հայկ Նահապետյանը նկատեց՝ պետությունների հարաբերությունները կարգավորվում են միջպետական պայմանագրերով։

«Վլադիմիր Պուտինը չպետք է նստեր Հ1 նայեր, որ Արմեն Գրիգորյանի բանավոր խոսքը լսեր։ Նիկոլ Փաշինյանի գլխավորությամբ ԱԽ նիստ է եղել, ՌԴ-ին գրավոր դիմելու վերաբերյալ պաշտոնապես խոսք եղե՞լ է, չի եղել։ Սուրեն Պապիկյանը զրուցել է Սերգեյ Շոյգուի հետ, Ռուսաստանին գրավոր դիմելու վերաբերյալ խոսակցություն եղե՞լ է, ո՛չ։ ՀԱՊԿ-ում մեր ներկայացուցիչը գրավոր հայտ ներկայացրե՞լ է, որ ՀԱՊԿ քարտուղարությունը, հետո էլ ղեկավարությունը կոնկրետ որոշում կայացնի։ Նման բան չի եղել։

Այսինքն` մենք չենք դիմել։ Դու կարգը չես պահպանում, փոխարենն իմիտացիա ես ստեղծում, թե իբր բանավոր խոսքով, պատգամավորների ելույթով դիմել են։ Մանկապարտեզ չէ, պետությունների հարաբերությունները պայմանագրերով ու ընթացակարգերով են որոշվում»,-ասաց Հայկ Նահապետյանը։

Փորձագետն ընդգծում է, որ երեկվա ռազմական գործողություններից հետո Սյունիքը մեկուսանում է, քանի որ եթե Ադրբեջանը լայնածավալ ռազմական գործողություններ սկսի, Երևան-Գորիս ճանապարհով անցնող ցանկացած օգնություն հարվածի տակ կհայտնվի։

Փորձագետը հիշեցրեց ապրիլին Նիկոլ Փաշինյանի այցը Սյունիք, որտեղ նրան բնակիչները բողոքի ակցիաներով էին դիմավորել։ Հայկ Նահապետյանը նշեց, որ բազմաթիվ լրատվամիջոցներ գրել էին, թե վարչապետը մարզպետարանում խորհրդակցության ժամանակ ասել է, որ եթե Մեղրիի միջանցքն իրենց կամքով, խաղաղ կյանքի դիմաց տան, ուրեմն պատերազմով կվերցնեն։ Փորձագետը նկատում է, որ այդ հայտարարությունը Նիկոլ Փաշինյանի կողմից չհերքվեց։ Ավելին` որևէ լրատվամիջոց ապատեղեկատվություն տարածելու հետ կապված պատասխանատվության չենթարկվեց, քանի որ դրա մեջ լուրջ մեղադրանք կար։

«Դա որևիցե արձագանք չստացավ, հետևաբար կարող եմ ենթադրել, որ Նիկոլ Փաշինյանը կյանքի է կոչում իր նախընտրական խոստումները։ Պատերազմով տարածքներ է հանձնում՝ դրա մեջ մեղադրելով ՌԴ-ին ու ՀԱՊԿ-ին»,-նշեց Հայկ Նահապետյանը։

Հիշեցնենք, որ նոյեմբերի 16-ին ադրբեջանական կողմը լայնածավալ հարձակում էր գործել ՀՀ արևելյան սահմանագոտում տեղակայված հայկական դիրքերի վրա։ Ռազմական գործողությունների հետևանքով հայկական կողմն ունի 1 զոհված, 13 գերեվարված զինծառայող, ևս 24 զինծառայողի հետ կապը կորել է մարտական գործողությունների ընթացքում։ Հակառակորդի վերահսկողության տակ է անցել երկու մարտական հենակետ։ Այժմ հայ-ադրբեջանական սահմանին իրավիճակը հարաբերական կայուն է։

Աղբյուր` Փաստինֆո