Փաստ ինֆո

Նոյեմբերի 16-ին տեղի ունեցած մարտական գործողությունների ընթացքում կորցրել ենք երկու կարևոր՝ ստրատեգիական նշանակության դիրք, որը վերահսկում է Երևան-Արցախ, Երևան-Գորիս ճանապարհը։ Ով այդ դիրքերին տիրում է՝ անմիջապես հսկում է Երևան-Գորիս ճանապարհը։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը։

Հիշեցնենք, որ երեկ Ադրբեջանի կողմից հերթական ռազմական ագրեսիայի հետևանքով հայ-ադրբեջանական սահմանին ռազմական գործողություններ են եղել, ինչի հետևանքով հայկական կողմն ունեցել է 1 զոհ, գերեվարվել է 13 զինծառայող, ևս 24 զինծառայողի հետ կապը կորել է մարտական գործողությունների ընթացքում։ ՀՀ ՊՆ նաեւ պաշտոնապես հաստատել է, որ կորցրել ենք երկու հենակետ։

Եղիազարյանի փոխանցմամբ, այդ հենակետերը ստրատեգիական նշանակության են։ Փորձառու զինվորականը գտնում է, որ երեկ տեղի ունեցած գործողությունների պատճառը նախապես պայմանավորվածությունն է եղել, որով խոստացել էին հակառակորդին հանձնել ճանապարհը, որը դեռ չեն կարողացել տալ։ Մարտական գործողությունների ընթացքում թշնամին վերցրել է երկու դիրք, հետո, ըստ Եղիազարյանի, կամաց-կամաց կվերցնի Իշխանասարը, ապա՝ միանգամից կսկսի սպառնալ։

«Երևան-Գորիս ճանապարհին թնդանոթները կդնեն, կասեն՝ տվեք միջանցքը, թե չէ՝ ճանապարհը ռմբակոծելու ենք, մերոնք էլ ասելու են՝ վայ, եկեք փրկենք Զանգեզուրը, միջանցքը տանք, որ Զանգեզուրը փրկենք։ Կարծում եմ՝ մեր տղաներն էլ առանց պատրաստվելու պատերազմել են, ինչի հետևանքով ունենք այդքան զոհեր, կորցրել ենք երկու կարևոր դիրք, որով վերահսկվում է Երևան-Արցախ, Երևան-Գորիս ճանապարհը»,- նշեց Եղիազարյանը՝ ընդգծելով. «Կարծում եմ՝ դա հերթական ձևն է, հերթական ուղին է, հերթական մեյմունությունն է, որով ուզում են տալ այդ ճանապարհը, որը ժամանակին խոստացել են տալ։ Այսօր չեն կարողանում տալ, որովհետև վախենում են ժողովրդական ընդվզումից, ըմբոստությունից, հասկանում են՝ դա դավաճանություն է։ Դավաճանել են ի սկզբանե ժողովրդին»։

Հարցին՝ արդյո՞ք նույն սցենարն է, ինչ Արցախում՝ ռազմական գործողություններով, զոհերով տարածքները տալիս են թշնամուն, Եղիազարյանը պատասխանեց՝ այդտեղ սցենար էլ չկա, պարզունակ, մեյմունություն է, կապիկության շարունակությունն է, սցենարն ավելի խորիմաստ է։

«Խորհրդավոր է երևում սցենարը, չգիտես՝ դեպքերն ինչպես են զարգանալու, իսկ այս դեպքում երևում է, թե դեպքերն ինչպես են զարգանալու, սա ընդամենը հերթական կապիկություն է, որի շրջանակներում բերեցին դրեցին Պապիկյանին՝ որպես պաշտպանության նախարար։ 3-4 ժամ մարտական գործողություններ էր ընթանում և հանրությունը ոչինչ չգիտեր»,- նշեց Եղիազարյանը՝ հավելելով, որ ինքը 3-4 ժամ ավելի շուտ է իմացել, որ Իշխանասարի մոտ մարտական գործողություններ են եղել, քան՝ այդ մասին հրապարակումներ են եղել։

Եղիազարյանը, ունենալով այդ տեղեկությունները, չի հավատացել, մտածել է՝ սուտ է, բայց պարզվել է, որ ոչ թե սուտ էր, այլ՝ գաղտնի էր պահվում մի քանի ժամ՝ մինչև դիրքերը տան։

Դիտարկմանը՝ ստացվում է, որ ինֆորմացիոն բլոկադա էր ստեղծվել, որ տեղեկատվական արտահոսք չլիներ, դիրքերը հանձնեին, հետո՝ այդ մասին հայտարարվեր՝ Եղիազարյանը դրական արձագանքեց՝ նշելով. «Այո, եթե տղաները, մեր զորքերը չդիմանային, գային Իշխանասարը գրավեին արդեն, անմիջապես ճանապարհի վրա կանգնեին, իրենց երևի ձեռնտու կլիներ, բայց այդպես չեղավ, որովհետև հայ տղամարդն ուշքի է եկել, հայ տղամարդը կռվում է։ Ողջունում եմ այդ զինվորներին, ցավում եմ՝ զոհերի, անհետ կորածների համար։ Ասում եմ՝ կեցցեք, տղերք, ամեն ինչ պետք է անենք՝ մեր հայրենիքը պաշտպանենք։ Եկել է այն ժամանակը, որ ամեն մի հիմար հրամանին ենթարկվելն ավելի մեծ հիմարություն է, քան՝ հրաման տվողն է տալիս։ Այդ ժամանակն է եկել, պարտավոր ենք պաշտպանել մեր հայրենիքը»։

Հեղինակ՝ Իզաբել Սահակյան

Աղբյուր` Փաստինֆո