Փաստ ինֆո

Սյունիքի մարզի Սիսիան խոշորացված համայնքի Իշխանասար գյուղում նախօրեին ադրբեջանական սադրանքների հետևանքով ժամեր շարունակ կրակոցներ են լսվել, բայց բնակիչների շրջանում տագնապ չկա։ 

«Կրակոցները եղել են մեզնից 20-30 կմ հեռու, բայց ժամը մեկից ձայները մենք լսել ենք, մոտ չեն եղել։ Ժողովուրդն էլ իր համար իր տեղում էր, դպրոցն աշխատել է, օրը նորմալ անցել է։ Ժամը վեցից հետո էլ կրակոցի ձայներ չենք լսել։ Գյուղի գիշերային լույսերը տվել են, ամբողջ գիշեր լույսերը վառվել է, եթե պատերազմ լիներ, լույսերը բնական է, չէին տա»,- «Փաստինֆո»-ի հետ զրույցում նշել է Իշխանասարի ղեկավար Մարատ Պետրոսյանը։

Վարչական ղեկավարը Երկրապահ կամավորականների վարչության անդամ է ու նշում, որ ինքն էլ, կամավորներն էլ առաջին պատրաստվածությանն էին բերվել, իսկ սադրանքի պատճառը հասկանալի էր.

«Բնականաբար, ցանկացած պահի երբ հարևանը հարևանից բան է ուզում՝ չի տալիս, պետք է կռիվ սկսվի։ Ինչի՞ մասին է խոսքը։ Պետությունը միջանցք է ուզում և մենք համաձայն չենք։ Սյունիքում տարածք չունենք, որ տանք թուրքին»։

ՀՀ ՊՆ-ից հաղորդել են, որ ադրբեջանական ագրեսիայի հետևանքով 13 գերի, մեկ զոհված և 24 անհետ կորած զինծառայող կա, սակայն նրանցից որևէ մեկը Իշխանասարի բնակիչ չէ։ Տեղեկությունները, թե նոյեմբերի 16-ին Սյունիքում հայկական դիրքերի վրա ադրբեջանական զինուժի հարձակումից հետո զինծառայողների մի քանի ծնողներ Իշխանասար գյուղում, թողնելով մեքենաները փորձել են դիրքեր բարձրանալ, Պետրոսյանը հերքում է։

«Այսօր մեկ ծնող է եկել, որ որդին առաջին գծում է, ասել է ուզում է գնալ՝ տեսնել։ Որդին ասել է՝ լավ եմ, առողջ եմ, պետք չի գաս ու կապը անջատել։ Ծնողը գալիս է երեխուն տեսնի ի՞նչ անի։ Մենք նաև գիտենք, որ մեկ զոհ է եղել, նրա մարմինը դուրս է բերվել»։
Պետրոսյանը նշեց, որ չորս տարի պատերազմի դաշտում է եղել։ Կարծում է՝ զինադադարը անարդյունավետ է։

«Ինքը ուզում է, մենք տալիս, ինչա՞ դրա վերջ՝ կռիվ։ Այսօր մենք պետք է մտածենք՝ Ստեփանակերտը թուրքերի թիկունքում է։ Ստեփանակերտը շրջափակման մեջ է։ Նա էլ միջանցք է ուզում, չեմ տեսնում, որ մեր կառավարությունը պատրաստ է միջանցք տալու։ Եթե էսօր հայի մեջի թուրքը չլինի՝ մենք տանուլ չենք տա, մենք կհաղթենք»,- ասաց գյուղի ղեկավարը։

Աղբյուր` Փաստինֆո