Փաստ ինֆո

Ինչու՞ փոխեցիք պաշտպանության նախարարին։ ԱԺ-ում ՀՀ վարչապետ Նիկոլ Փաշինյանին այս հարցն ուղղեց «Պատիվ ունեմ» խմբակցության պատգամավոր Տիգրան Աբրահամյանը։ 

Պատգամավորը հետաքրքրվեց՝ նախկին նախարար Արշակ Կարապետյանն ի՞ր նախաձեռնությամբ է ազատման դիմում գրել, թե՞ դա եղել է վարչապետի որոշումը։

«Հենց այս փուլում պաշտպանության նախարար փոխելու հիմնավորումը ո՞րն է եղել։ Ո՞ր տրամաբանությամբ եք ընտրել նոր նախարարին, և այս նշանակումն ունե՞ր ներքաղաքական կամ արտաքին քաղաքական բաղադրիչ։ Ձեր թիմակիցներից մեկը երեկ ասում էր, որ ի տարաբերություն Արշակ Կարապետյանի, Սուրեն Պապիկյանը ՌԴ գեներալիտետից կախում չունի»,-նշեց Տիգրան Աբրահամյանը։

Վերջինս վարչապետից հետաքրքրվեց նաև, թե ո՞վ տվեց չկրակելու հրաման, քանի որ տարածված տեսանյութերից ակնհայտ է, որ մարտական մեկ դիրքի գրավումը տեղի է ունենում առանց փոխհրաձգության։

ՀՀ վարչապետ Նիկոլ Փաշինյանը նախ անդրադարձավ պաշտպանության նախարարի փոփոխությանը՝ նշելով, որ նախարարի պաշտոնը հայեցողական է և դրանով շատ բան է ասվում.

«Չեմ կարծում, թե պաշտպանության նախարարի փոփոխության մանրամասները պետք է հրապարակային քննարկվեն։ Հայեցողական բառն ամբողջական պատկերացում է տալիս։ Այսինքն նախարար նշանակվում է տվյալ դեպքում վարչապետի հայեցողությամբ և ազատվում է վարչապետի հայեցողությամբ»,-ասաց Նիկոլ Փաշինյանը։

Վարչապետը կարևոր է համարում, որ և՛ ԱԳ նախարարի, և՛ պաշտպանության նախարարի կարգավիճակում քաղաքական թիմի ներկայացուցիչներ են։

Անդրադառնալով կրակելու չկրակելու հրամանին՝ Նիկոլ Փաշինյանն ասաց, որ պատգամավորը երկու տարբեր դրվագներ խառնում է և փորձում մեկ դրվագ ստեղծել.

«Ի բնե հնարավոր չէ այդպիսի բան, որ ՀՀ սահմանների պահպանության վերաբերյալ տրվի չկրակելու կամ սահմանը չպաշտպանելու հրաման։ Դա կլինի պետական դավաճանություն»,-ասաց Նիկոլ Փաշինյանը։

Աղբյուր` Փաստինֆո