Փաստ ինֆո

Ադրբեջանի քաղաքականությունը միտված չէ միջանցք ստանալուն։ Նրանց քաղաքականությունը միտված է Սյունիքն ամբողջովին հայաթափելուն։ «Փաստինֆո»-ի հետ զրույցի ժամանակ ասաց ռազմական փորձագետ Հայկ Նահապետյանը՝ անդրադառնալով հայ-ադրբեջանական սահմանին ստեղծված իրավիճակին և Կապան-Ճակատեն ճանապարհին ադրբեջանական անցակետերի տեղադրմանը։

Փորձագետի կարծիքով՝ այն գործողությունները, որոնք կատարվում են Ադրբեջանի կողմից, դրանք սահմանամերձ բնակավայրերի բնակիչների նկատմամբ հոգեբանական ազդեցություն թողնելու նպատակ ունեն։ Ադրբեջանի և Թուրքիայի ղեկավարների գնահատմամբ՝ բռնության, վախի մթնոլորտի, կյանքի, սեփականություն ունենալու իրավունքների ոտնահարումից հետո այդ գյուղերն աստիճանաբար կհայաթափվեն։

Հայկ Նահապետյանը նշում է, որ սովորաբար ադրբեջանցիների հետ պայմանավորվածություն է լինում այն մասին, որ երբ այլընտրանքային ճանապարհը պատրաստ է լինում, Ադրբեջանը նոր փակում է ճանապարհը, սակայն այս դեպքում այլընտրանքային ճանապարհը դեռ պատրաստ չէ։

«Դա, օրինակ, եղավ Գորիս-Կապան ճանապարհին անցակետեր տեղադրելու ժամանակ, երբ հայկական կողմը հայտարարեց, որ շրջանցող ճանապարհն արդեն պատրաստ է։ Այսինքն` Ադրբեջանին պետք չէ, որ Հայաստանում տարածքների հանձնման հետ կապված հուզումներ լինեն, որովհետև իրենց ձեռք է տալիս, որ Նիկոլ Փաշինյանը լինի ՀՀ վարչապետի աթոռին նստած անձը»,-ասաց փորձագետը։

Վերջինս ընդգծեց՝ այժմ ստեղծվել է իրավիճակ, որ Ճակատենը և ևս 5 գյուղ ձմռան նախաշեմին գտնվելու են շրջափակման մեջ։ Այդ գյուղերը պետք է անցնեն ադրբեջանական մաքսակետով, ընդ որում ինչպես փորձագետն է նշում, դրանք այսօր են մաքսակետ, իսկ վաղը թշնամին կարող է դիրքեր դնել, հետևաբար հարց է առաջանում, թե գյուղացին այժմ ինչպե՞ս է այնտեղ ապրելու։

«Նպատակը Սյունիքը նվազագույնը հայաթափելն է, որովհետև հայկական կողմը փաստարկել է, որ միջանցքի հետ կապված խոսակցություն չկա։ Ադրբեջանական կողմը, ինչպես նաև Նիկոլ Փաշինյանը միջանցքը քարոզչական առումով են օգտագործում։ Նիկոլ Փաշինյանն ասում է՝ Ադրբեջանը միջանցք էր ուզում, ես ստիպված ճանապարհ եմ տալիս։ Ադրբեջանը շատ բան է ուզում։ Այդ ուզելը որևիցե փաստաթղթի վրա հիմնավոր չկա գրված։ Նոյեմբերի 9-ի և հունվարի 11-ի հայտարարությունների մեջ այդ ստիպել բառը չկա, կա փոխադարձ պարտավորություն»,-նշեց Հայկ Նահապետյանը։

Փորձագետը կարծում է, որ Նիկոլ Փաշինյանի և Ալիևի բանավոր պայմանավորվածության տիրույթում հիմա տրվում են տարածքներ, բարձունքներ, հենակետեր։ Հայկ Նահապետյանի խոսքով այդ տարածքներն իրենց կոորդինատներով ամենայն հավանականությամբ նշված կլինեն այն փաստաթղթում, որը կստորագրեն Հայաստանի և Ադրբեջանի ղեկավարները։

«Երեկ տեսանյութ տարածվեց, որ Ջերմուկի մոտ հայկական կողմը լքում է իր հենակետերը։ ՀՀ ՊՆ-ն այդ մասին ոչինչ չի ասել։ Ստացվում է՝ Նիկոլ Փաշինյանը նախապես հանձնում է տարածքներ, որովհետև այդ մարտական հենակետերում զինծառայողներն ամենայն հավանականությամբ չկրակելու հրաման ունեին։ Եթե հայկական կողմը, որն իր հենակետում չի կրակում ադրբեջանցիների վրա, ինչը պարտավոր էր անել, ուրեմն կա չկրակելու հրաման, ինչն ապօրինի է»,-հավելեց Հայկ Նահապետյանը։

Աղբյուր` Փաստինֆո