Փաստ ինֆո

Ընդդիմության հիմնական թերությունն է, որ չի կարողանում գտնել այն հարցը, որ կարող է հասարակության մի մասի համար կարևորություն ներկայացնել: Ընդդիմությունը կարծում է, որ դա անվտանգությունն է, բայց պարզվում է՝ անվտանգությունը չէ, երբ կգտնի այդ հարցը, որ կարող է հասարակության մի մասին դրդի գործողությունների, այդ ժամանակ էլ կհաջողի իր պայքարում: «Փաստինֆո»-ի հետ զրույցում նման տեսակետ է հայտնել քաղտեխնոլոգ Արմեն Բադալյանը՝ հավելելով, որ ընդդիմությունը չի գտնում հանրության հետ խոսելու թեման:

Ըստ քաղտեխնոլոգի՝ մեր հանրության մտածելակերպը փոխվել է, անվտանգության հարցն այլևս ամենակարևորը չի նրանց համար, որպեսզի ինչ-որ գործողությունների դրդի, նրանց համար առավել կարևոր են սոցիալական խնդիրները.

«Դրա համար էլ ընդդիմությանը չի հաջողվում անվտանգության հարցերի հետ կապված լուրջ հաջողություններ ունենալ, ինչ-որ հաջողություններ է ունենում, բայց լուրջ հաջողություններ չի կարող ունենալ հենց այն պատճառով, որ հասարակության համար անվտանգության հարցը ամենակարևոր հարցը չէ, օրինակ՝ մթերքը թանկանում է, դա ավելի կարևոր է»,-ասաց Արմեն Բադալյանը:

Քաղտեխնոլոգը նաև նշեց, թե ընդդիմությունը չի օգտագործում խորհրդարանից դուրս բոլոր լծակները. «Փողոցային պայքար, որպես այդպիսին, տեղի չի էլ ունեցել, ընդամենը մի հատ երթ է եղել դեպի եռաբլուր և հանրահավաք, ուրիշ որևէ պայքարի միջոց տեղի չունեցավ»,-ասաց Արմեն Բադալյանը և շեշտեց, որ փողոցային պայքար սկսելու համար պետք է գտնել կարևորագույն հարցերը, որոնք հասարակության գոնե զգալի մասին կդրդի փողոց դուրս գալ.

«Բացի դրանից՝ պետք է կարողանաս այդ հարցը ճիշտ ներկայացնես, կարող է չկարողանաս ճիշտ ներկայացնել, արդյունքում հարցը կարևոր լինի, բայց հասարակությունը գործողությունների չդիմի, պետք է կարողնաս նաև ճիշտ օգտագործել փողոց դուրս գալու գործընթացը: Պետք է հստակ գործողություն անել և գտնել հասարակության համար կարևոր հարցերը: Ընդդիմությունը, որպեսզի ժողովրդին ասի՝ ինչի՞ համար է դուրս գալիս պայքարի, պետք է այդ հարցը ինքը նախևառաջ գտնի, եթե այդ հարցը չի գտել, ինչպես ասի՝ ինչի՞ համար է պայքարում»,-ասաց Արմեն Բադալյանը:

Դիտարկմանը, արդյո՞ ք ընդդիմությունը չի կարող որպես խորհրդարանական պայքարի միջոց դիտարկել այն, որ վայր դնի մանդատները և խորհրդարանական ճգնաժամ ստեղծի, քաղտեխնոլոգը նշեց, որ այդ դեպքում մանդատները կփոխանցվեն ընտրության արդյունքում հաջորդ ամենաշատ ձայն հավաքած քաղաքական ուժին.

«Անգամ եթե դաշինքի բոլոր անդամները մանդատները վայր դնեն, ճգնաժամ չի առաջանա, կվերցնեն նրանց մանդատները կփոխանցեն հաջորդ քաղաքական ուժին, օրինակ՝ 3 % հավաքած Հանրապետություն կուսակցությանը»։

Աղբյուր` Փաստինֆո