Փաստ ինֆո

Գորիս համայնքի ղեկավարի տեղակալ Մենուա Հովսեփյանն ինքնակամ ներկայացել է Գորիս ՔԿՀ, սակայն չի կալանավորվել, ՔԿՀ-ում չեն ընդունել։ Հովսեփյանի պաշտպան Արմեն Մելքոնյանը «Փաստինֆո»-ի հետ զրույցում ասաց, որ ՔԿՀ-ից ասել են, որ դատարանի որոշումը դեռևս չեն ստացել, ուստի՝ չեն կարող կալանավորել։

Պաշտպանի փոխանցմամբ՝ Մենուա Հովսեփյանը գնացել է վարույթն իրականացնող մարմին՝ Սյունիքի մարզի ընդհանուր իրավասության դատարան, դատարանն ինչ որոշում կայացնի՝ այնպես էլ կանի։

Ինչպես արդեն տեղեկացրել ենք՝ Վերաքննիչ քրեական դատարանը՝ նախագահությամբ դատավոր Սևակ Համբարձումյանի, երեկ բավարարել է դատախազության բողոքը և որոշում կայացրել՝ Մենուա Հովսեփյանին 30 մլն դրամ գրավի դիմաց ազատ արձակելու մասին Սյունիքի մարզի ընդհանուր իրավասության դատարանի որոշումը բեկանելու, Հովսեփյանին կրկին կալանավորելու մասին։

Ա.Մելքոնյանի խոսքերով՝ Վերաքննիչ քրեական դատարանը որևէ որոշում չի տվել, ավելին՝ անգամ չի նշել, որ անհապաղ պետք է կալանավորել Մենուա Հովսեփյանին, բայց դատական նիստից հետո դատավորը դատախազին հրահանգել է՝ փակել դուռը, որ հանկարծ Մենուա Հովսեփյանը դուրս չգա։

«Սա իր լիազորություններից դուրս գործողություններ էր և ևս մեկ անգամ բացահայտեց, որ դատարանն ուղղակի կամակատար է, ուրիշ ոչինչ, անգամ իրեն օրենքից չբխող գործողություններ է թույլ տալիս։ Միայն մեր կողմից աղմուկ բարձրացնելուց հետո հետ կանգնեցին իրենց մտքից և Մենուան դուրս եկավ, որովհետև նման կարգ չկա։ Եթե դատարանը չի գրում, որ պետք է անհապաղ դատարանի նիստերի դահլիճից կալանավորեն, ապա իրավունք չունեն»,- նշեց պաշտպանը՝ հավելելով, որ այդ պայմաններում պետք է ստանալ դատական ակտը, բողոքարկել, ինչից հետո այն կուղարկվի կատարման։

Պաշտպանը չի բացառում նաև, որ փորձ է արվում ստեղծել իրավիճակ, որ ասեն՝ Հովսեփյանը կարգ է խախտել, 5 րոպե ուշացել է և գրավի 30 մլն դրամը պետք է գանձել պետական բյուջե։

Վերաքննիչ քրեական դատարանի որոշումը ստանալուց հետո պաշտպանության կողմը վճռաբեկ բողոք կներկայացնի։

Դիտարկմանը, որ Գորիս-Կապան ավտոճանապարհին ադրբեջանցիները մաքսակետեր են տեղադրում և այդ պայմաններում Առուշանյանն արդեն կալանավորված է, իսկ Հովսեփյանին կալանավորելու որոշում է կայացվել, արդյո՞ք այդտեղ կապ տեսնում է, պաշտպանը նշեց, որ դա հենց այդ հանգամանքով է պայմանավորված, ընդ որում, Վերաքննիչ քրեական դատարանի որոշման հրապարակումից հինգ րոպե առաջ Մենուա Հովսեփյանը Երևանից կարգավորում էր շրջափակման մեջ մնացած գյուղերում հացի մատակարարման հարցերը, քանի որ այդ գյուղերը նախօրեից մնացել էին առանց հացի և նման մարդուն կալանավորում են։

«Դատավորն էլ հեգնում է, ասում է՝ բա որ այդպես խնդիր լուծող ես, ինչու՞ թողեցիր, որ ադրբեջանցիները մաքսակետ դրեցիր։ Իբրև Մենուան չպետք է թողեր, որ մաքսակետ դնեին։ Մենք ապրում ենք այս իրականության մեջ, որևէ մեկը ոչ մի բան չի անում»,- նշեց Մելքոնյանը՝ ընդգծելով, որ դա արդեն միայն գորիսեցու խնդիրը չէ, դա Հայաստանի յուրաքանչյուր բնակչի խնդիրն է, բայց բոլորը զբաղված են այլ հարցերով, հետո՝ կինոյի պես կնայեն, թե ինչպես են ադրբեջանցիները կամաց-կամաց մեր հայրենիքը վերցնում։

Հիշեցնենք, որ օգոստոսի 16-ին ՀՀ ՔԿ-ն որոշումներ է կայացրել Գորիս համայնքի ղեկավարի պաշտոնակատար Իրինա Յոլյանին, համայնքապետարանի երկու աշխատակիցներին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ համայնքի ղեկավարի տեղակալ Մենուա Հովսեփյանին՝ ՀՀ քրեական օրենսգրքի 149.1-րդ հոդվածի 2-րդ մասի 1-ին և 2-րդ կետերով, 179-րդ հոդվածի 3-րդ մասի 1-ին և 179-րդ հոդվածի 2-րդ մասի 1-ին կետերով նախատեսված հանցավոր արարքներ կատարելու համար որպես մեղադրյալներ ներգրավելու մասին: Նրանք ձերբակալվել են երեկ՝ նրանց նկատմամբ որպես խափանման միջոց կալանավորումն ընտրելու միջնորդության քննության նպատակով դատարան ներկայացվելու համար։ Կալանավորման միջնորդություններից դատարանը բավարարել է միայն Մենուա Հովսեփյանի վերաբերյալ ներկայացված միջնորդությունը, իսկ ձերբակալված Գորիսի համայնքապետարանի աշխատակցուհիներ՝ 66-ամյա Ս.Մկրտչյանին, Ա.Չոպչունցին և Գորիսի փոխքաղաքապետ Ի. Յոլյանին կալանավորելու մասին միջնորդությունները մերժվել են։ Վերջինս սեփական դիմումի համաձայն ազատվել է պաշտոնից՝ մասնակցելու համար Գորիսի ՏԻՄ ընտրություններին որպես Առուշ Առուշանյանի ներկայացուցիչ։ Նախաքննության ավարտական փուլում ՔԿ-ն վերաորակել է արարքը։ Այժմ Իրինա Յոլյանը, Սուսաննա Մկրտչյանը և Չոպչունցը մեղադրվում են ՀՀ քրեական օրենսգրքի 308-րդ հոդվածի հատկանիշներով, Մենուա Հովսեփյանը՝ 149.1-րդ հոդվածի 2-րդ մասի 1-ին, 2-րդ կետերով, 308-րդ հոդվածի 2-րդ մասով և 179-րդ հոդվածի 2-րդ մասի 1-ին կետով։

Այժմ քրեական գործը գտնվում է Սյունիքի մարզի ընդհանուր իրավասության դատարանի Բորիս Բախշիյանի վարույթում։

Հեղինակ՝ Իզաբել Սահակյան

Աղբյուր` Փաստինֆո