Փաստ ինֆո

Պատերազմի ռիսկային վտանգները շարունակում են գոյություն ունենալ։ Սյունիքը դառնում է վտանգավոր բախման կետ։ Այդ բախումը կարող է հրահրվել դրսից,- այս մասին մամուլի ասուլիսին հայտնեց ՀՀ ՊՆ նախկին փոխնախարար Արտակ Զաքարյանը։ Ստեղծված իրավիճակից Զաքարյանը մեկ ելք է տեսնում՝ իշխանափոխություն։

«Իրավական առումով դեռևս աշխատանք կա անելու։ Եթե հնարավոր լինի ընդդիմությանը հավաքել հասարակության մեծամասնության աջակցությունը, իրավական, սահմանադրական եղանակով իշխանափոխություն պահանջել, ստեղծել նոր քաղաքական իրավիճակ, որոշումների կայացման նոր մեխանիզմ և ստիպել, որպեսզի միջազգային հանրությունը հաշվի նստի նոր իրավիճակի հետ, հավատացեք՝ դա հնարավորություն կտա շատ խնդիրներ լուծել ի նպաստ ՀՀ-ի»։

Զաքարյանն անդրադարձավ Հյուսիս-Հարավ նախագծի կարևորությանը, որը գլոբալ աշխարհաքաղաքաքական պրոյեկտի մաս էր կազմում։ Այսօր Ադրբեջանն ու Թուրքիան Նախիջևանը Ադրբեջանի հարավային հատվածին կապող միջանցքի խնդիր են դրել, դրանով փորձում են փոխել Հյուսիս-Հարավը՝ արևելք արևմուտքով։

«Փորձում են չինական շուկան դեպի Եվրոպա կապել Ադրբեջանի և Թուրքիայի վերահսկողության տակ գտնվելիք կոմունիկացիայով։ Դա նշանակում է՝ Հայաստանին դուրս թողնել որևէ ազդեցությունից ու դերակատարությունից։ Սուտ է ասում վարչապետ կոչվածը, թե միջանցքային տրամաբանություն չկա։ Ադրբեջանցիները որոշեցին, որ Գորիս-Կապան ճանապարհը ադրբեջանական տարածք պետք է լինի։ Ըստ էության կատարվել է ապօրինի գործարք, հետևաբար չեմ հավատում, որ ադրբեջանցիներն առանց համաձայնության մաքսակետ են դրել։ Դա առնվազն ՌԴ-ն չէր կարող թույլ տալ, նշանակում է, որ Հայաստանի համաձայնությունը՝ թաքնված կամ բանավոր ձևով, եղել է»։

ՀՀ ՊՆ նախկին փոխնախարարը նաև հայտնեց, որ մանկապատանեկան խաղերի միջոցով հայտարարվում է, որ հայկական կողմը ևս մաքսակետ է տեղադրելու, սակայն, ըստ Զաքարյանի, անիմաստ քայլ է, քանի որ չի գործելու որպես միջազգային ճանապարհ։

Այլընտրանքային Տաթև-Աղվանի ճանապարհն էլ մեծ գրավչություն չունի, որ կարողանա ապահովել Հյուսիս-Հարավ նախագծի նպատակը։

«Հիմա գտնվում ենք մի իրավիճակում, որ ՀՀ-ն ունենալով փայլուն շանս՝ վերականգնելու տարածաշրջանային նշանակությունը, դա էլ են ձախողում։ Հիմա հարց է առաջանում՝ ինչի՞ են մնացել իշխանության, ինչո՞ւ նորից խաբեցին հասարակությանը։ Պատերազմի ռիսկային վտանգները ինչպես եղել են, այնպես էլ շարունակում են գոյություն ունենալ։ Սյունիքը ևս դառնում է վտանգավոր բախման կետ։ Այդ բախումը կարող է հրահրվել դրսից՝ դրսի ուժային կենտրոնից, տուժողները կարող են լինել ՀՀ քաղաքացիները»,- եզրափակեց Զաքարյանը։

Աղբյուր` Փաստինֆո