Փաստ ինֆո

Պատերազմը ավարտվեց, բայց դրա հետևանքները դեռևս շարունակվում են, պատերազմի ելքով ոչ մեկը գոհ չէ:«Փաստինֆո»-ի եթերում հայտարարել է միջազգային հարցերով փորձագետ Սուրեն Սարգսյանը և մանրամասնել.

«Մենք դժգոհ ենք, քանի որ տարածքներ ենք կորցրել, Ադրբեջանը դժգոհ է, որովհետև ամբողջությամբ չի ստացել այն, ինչ ուզում էր ՝ Արցախն ամբողջությամբ չի տարել, ռուսներին ձեռք չի տալիս այս իրավիճակը, որովհետև «ոտնատեղը», որ իրենք դրել են, շատ ավելի փոքր է, քան պետք է լիներ, իսկ Իրանը դժգոհ է, քանի որ իր արտաքին սահմանը, որը նախկինում Հայաստանի և Արցախի հետ սահման էր, հիմա Ադրբեջանի հետ է սահմանակից»:

Բանախոսի համոզմամբ՝ Թուրքիան և Ադրբեջանն են ստիպում Հայաստանին, որպեսզի ապաշրջափակում իրականացնի, իսկ ապաշրջափակումն իրականացվելու է միայն մեր հաշվին՝ փոխարենը ոչինչ չստանալով.

«Ի՞նչ ենք մենք ստանալու ապաշրջափակման դիմաց, ենթադրենք՝ դեպի Ռուսաստան երկաթուղին եղավ, այս դեպքում հայկական բեռները դեպի Ռուսաստան տանելու ենք ավելի երկար, թանկ և վտանգավոր ճանապարհով, քանի Վրաստանով ճանապարհն է, ո՞րն է սրա տրամաբանությունը: Մենք իրականում ոչինչ չենք ստանալու, որովհետև որևէ հայ գործարար Ադրբեջանի տարածքով ապրանքը Ռուսաստան չի տանելու»,-ասաց բանախոսը և շեշտեց, որ ապաշրջափակումը ձեռնտու է միայն Թուրքիային և Ադրբեջանին:

Սուրեն Սարգսյանը նաև չբացառեց, որ բանակցություններ են գնում հայ-թուրքական հարաբերությունների վերաբերյալ,: Ըստ նրա՝ այդ բանակցությունների սեղանին կարող է լինել նաև Սյունիքով ճանապարհը, որը նախապայման է լինելու Հայաստանի առջև:

Անդրադառնալով «խաղաղ դարաշրջան» բացելու վերաբերյալ իշխանության հայտարարություններին, փորձագետը ընդգծեց՝ միակողմանի խաղաղություն չի լինում.

«Եթե ուզում ես խաղաղություն, պետք է գիտակցես, որ դիմացինդ էլ է ուզում խաղաղություն, բայց մեր թշնամին անթաքույց ասում է՝Տավուշն էլ է իմը, Գեղարքունիքն էլ է իմը, Սևանն էլ Երևանն էլ, այս դեպքում ի՞նչ խաղաղության մասին կարող ես խոսել»:

Նրա արձանագրմամբ՝ «խաղաղ դարաշրջան բացելու մասին» որևէ փաստաթուղթ ստորագրվելու դեպքում Ադրբեջանը պահանջելու է ճանաչել իր տարածքային ամբողջականությունը, ներառյալ՝ Արցախը.

«Մինչև Հայաստանը չճանաչի Ադրբեջանի տարածքային ամբողջականությունը՝ Արցախն էլ մեջը, որևէ բան տեղի չի ունենա»:
Սուրեն Սարգսյանի արձանագրմամբ՝ պատերազմից և նոյեմբերի 9-ի եռակողմ համաձայնագրից հետո Հայաստանը տարածաշրջանում այլևս գործոն չէ,տարածաշրջանի բոլոր երկրները փորձում են մեր հաշվին իրենց հարցերը լուծել.

«Այս ողջ ընթացքում զիջումներ միայն մենք ենք արել, դելիմիտացիան և դեմարկացիան ևս մեր հաշվին է լինելու: Չգիտես ինչու՝ միայն մեր հաշվի է լինում տարածքների զիջում, իսկ ադրբեջանցիները մեզ ոչինչ չեն տալիս, սա ոնց հասկանանք զիջումներ»,-ասաց նա:

Աղբյուր` Փաստինֆո