Փաստ ինֆո

Մեր այսօրվա ամենակարևոր խնդիրը շարունակական պարտությունը և զիջումները դադարեցնելն է:

Այո՛, մեզ պետք է խաղաղություն, բայց պետք է արժանապատիվ խաղաղություն, այլ ոչ թե այն կեղծ օրակարգերը, որոնք բերում են այս իշխանությունները և ուզում են «կերցնել» մեզ: Այս մասին «Հայաստան» դաշինքի հանրահավաքի ժամանակ հայտարարեց պատգամավոր Վահե Հակոբյանը՝ հավելելով, որ շարունակական զիջումներով մենք արժանապատիվ խաղաղության չենք հասնի.

«Այսօրվա իշխանությունը մեզ տանում է կեղծ օրակարգով, փորձելով խաղաղության կեղծ իմիտացիա ստեղծել, բայց այսօր տեսնում ենք հերթական անգամ ինչ կատարվեց Շուշիում: Այս ամենաթողությունը բերելու է ազգի կործանման, ինչն էլ ուզում են այսօրվա իշխանությունները: Մենք պետք է դիմադրենք պարտվողական հոգեբանությանը և պարտվողական քաղաքականությանը, որը վարում է այս իշխանությունը»,-ասաց Հակոբյանը:

Պատգամավորն անդրադարձավ նաև դեմարկացիայի և դելիմիտացիայի գործընթացին և ընդգծեց, որ մինչ այս գործընթացը սկսելը պետք է նախապայմաններ առաջ քաշել.

«Առաջին հերթին՝ մեր տղաների անվերապահ վերադարձ հայրենիք, Հայաստանի ինքնիշխան տարածքից ադրբեջանական զինուժին դուրս վռնդում, մեր ճանապարհները ցանկացած խոչընդոտից ազատում»,-ասաց Վահե Հակոբյանը և ընդգծեց՝ դեմարկացիայի և դելիմիտացիայի գործընթացը որևէ առնչություն չպետք է ունենա արցախյան հարցի կարգավորման հետ:

Աղբյուր` Փաստինֆո