Փաստ ինֆո

Երևանի ընդհանուր իրավասության դատարանի դատավոր Զարուհի Նախշքարյանի նկատմամբ կարգապահական վարույթ է հարուցվել՝ ՀՀ արդարադատության նախկին նախարար Ռուստամ Բադասյանի ներկայացրած հայցադիմումը մերժելուց հետո։ Բադասյանը շահագրգիռ էր՝ վարույթի հարուցմամբ։

«Փաստինֆո»-ի թղթակցի հաղորդմամբ՝ ԲԴԽ-ում այսօր կայացած նիստի ընթացքում Երևանի ընդհանուր իրավասության դատարանի դատավոր Զարուհի Նախշքարյանի ներկայացուցիչ Ռուբեն Մելիքյանը միջնորդություն ներկայացրեց՝ դատավոր Նախշքարյանին կարգապահական պատասխանատվության ենթարկելու վերաբերյալ գործը կարճելու մասին։ Միջնորդության հիմքում դրվել է այն հանգամանքը, որ դատավորի նկատմամբ կարգապահական վարույթ հարուցվել է Բադասյանի ներկայացրած հայցադիմումը մերժելուց հետո, ուստի, դատավորի ներկայացուցիչ Մելիքյանը գտնում է, որ այս հանգամանքը՝ համադրված առհասարակ նախարարության կողմից դատավորների նկատմամբ կարգապահական վարույթ հարուցելու ինստիտուտի վերաբերյալ լուրջ ինստիտուցիոնալ խնդիրների հետ, օբյեկտիվ, անկողմնակալ դիտորդի մոտ կարող է կասկածներ առաջացնել՝ վարույթի հարուցման իրավաչափության վերաբերյալ։

Ընդ որում, Բադասյանը դատավոր Նախշքարյանին կարգապահական պատասխանատվության ենթարկելու մասին երկու միջնորդությունները ԲԴԽ է ներկայացրել իր պաշտոնավարման վերջին օրը։ Բացի այդ՝ դատավորի նկատմամբ կարգապահական վարույթ է իրականացվում արդարադատություն կամ որպես դատարան օրենքով նախատեսված լիազորություններ իրականացնելիս՝ ինքնին իր կատարած օրենքի մեկնաբանության, փաստերի և ապացույցների գնահատման համար, ինչն արգելված է օրենքով։

Մասնավորապես, Դատավորը չի կարող ենթարկվել կարգապահական պատասխանատվության՝ իր կայացրած դատական ակտի համար, եթե նա բարեխղճորեն և պատշաճորեն փաստարկել է իր որոշումը՝ փաստերի ողջամիտ գնահատման և օրենքի՝ ողջամիտ մեկնաբանման հիման վրա։

«Այլ կերպ՝ կարգապահական պատասխանատվությունը բացառող հանգամանք է դատավորի ընտրած՝ փաստերի գնահատման և օրենքի մեկնաբանման տարբերակի գոյության իրավունքը և դատական պրակտիկայում բացարձակ մերժելի չլինելը, այլ ոչ թե՝ լիազոր մարմնի կողմից ճիշտ համարվող իրավաբանությանը չհարելը։ Հակառակ մոտեցման պայմաններում՝ որոշման համար դատավորի նկատմամբ կարգապահական վարույթ հարուցելու լիազորությունը հատկապես արդարադատության նախարարության մասով կդառնա դատավորի անկախության իրավական արժեքի նկատմամբ լուրջ միջամտություն՝ վտանգելով արդար դատաքննության մարդու հիմնարար իրավունքը»,- նշեց Մելիքյանը՝ ընդգծելով, որ տվյալ դեպքում դատավոր Նախշքարյանը մանրամասն հիմնավորել է խնդրո առարկա որոշումը։

Կողմերի դիրքորոշումը լսելուց հետո ԲԴԽ-ն հեռացել է խորհրդակցական սենյակ՝ որոշում կայացնելու, ինչից հետո հրապարակվեց որոշում՝ վարույթի կարճման միջնորդությունը առաջին հիմքով մերժել, իսկ երկրորդ հիմքով՝ միջնորդության լուծումը հետաձգել և փաստարկներին անդրադառնալ վարույթի վերաբերյալ որոշում կայացնելիս։ Այսինքն՝ դատավոր Զարուհի Նախշքարյանի կողմից կայացված դատական ակտում տեղ գտած գնահատականների, մեկնաբանման համար դատավորին կարգապահական պատասխանատվության ենթարկելու արգելքի վերաբերյալ փաստարկներին ԲԴԽ-ն կանդրադառնա կարգապահական պատասխանատվության ենթարկելու մասին միջնորդության լուծման ժամանակ։
ԲԴԽ նիստը հետաձգվեց՝ մինչև նոյեմբերի 15-ը՝ ժամը 15.00-ն

Հիշեցնենք, որ Երևանի ընդհանուր իրավասության դատարանի դատավոր Զարուհի Նախշքարյանի նկատմամբ կարգապահական վարույթ է հարուցվել դեռևս 1.5 տարի առաջ ընդդատության խախտման պատճառաբանությամբ դատարան ներկայացված հայցադիմումը վերադարձնելու մասին որոշում կայացնելու համար։ Մասնավորապես, ըստ ՀՀ արդարադատության նախարարության ներկայացուցչի կողմից ներկայացված միջնորդության՝ դատավորը վերադարձրել է գումարի բռնագանձման պահանջով ներկայացված հայցադիմումներից մեկը՝ արձանագրելով, որ սույն գործը չի կարող քննվել Երևանի ընդհանուր իրավասության դատարանի վարույթում, քանի որ պատասխանողը գրանցված է Վանաձորում, հետևաբար, գործը պետք է ըստ ընդդատության քննվի Լոռու մարզի ընդհանուր իրավասության դատարանի վարույթում, մինչդեռ, նախարարությունը գտնում է, որ դա վարկաբեկել է դատական իշխանությունը, նվազեցրել հանրության վստահությունը և կասկածներ առաջացրել՝ դատարանների անկողմնակալության, անաչառության վերաբերյալ։

Հատկանշական է, որ դատավորի նկատմամբ վարույթ է հարուցվել՝ ՀՀ արդարադատության նախկին նախարար Ռուստամ Բադասյանի ներկայացրած հայցադիմումը մերժելուց հետո։

Հեղինակ՝ Իզաբել Սահակյան

Աղբյուր` Փաստինֆո