Փաստ ինֆո

Այսօր հայտարարությամբ է հանդես եկել Ադրբեջանի ԱԳՆ-ն՝ նշելով, թե Ադրբեջանն անհրաժեշտ է համարում Ղարաբաղի հարցով Ադրբեջանի, Ռուսաստանի և Հայաստանի ղեկավարների եռակողմ հայտարարությունների կետերի ամբողջական կատարումը։

Նշված փաստաթղթի կետերի խախտման, սահմաններում մշտապես սադրիչ գործողությունների  առաջամարտիկ Ադրբեջանի ԱԳՆ-ն նշել է, թե  ամուր խաղաղության, զարգացման և առաջընթացի ապահովումը Ադրբեջանի ապագա տեսլականի ռազմավարության հիմքն է: Ավելին՝ այս երկրի ԱԳՆ-ն հայտարարել է, թե Ադրբեջանը պատրաստ է Հայաստանի հետ հարաբերությունները կարգավորել միջազգային իրավունքի սկզբունքների խիստ պահպանման հիման վրա, մասնավորապես, ինքնիշխանության, տարածքային ամբողջականության և միջազգային սահմանների անխախտելիության սկզբունքները։

«Տարածաշրջանում խաղաղության և անվտանգության ապագայի ապահովման համար այս փուլում կարևոր է լիովին իրականացնել եռակողմ հայտարարությունների դրույթները, և Ադրբեջանը Հայաստանից ակնկալում է փոխադարձ քայլեր՝ այդ ուղղությամբ իր ձեռնարկած քայլերին»,- ասվում է  Ադրբեջանի ԱԳՆ հայտարարության մեջ՝ խուսափելով անդրադառնալ ՀՀ սուվերեն տարածքի նկատմամբ իրենց ոտնձգությունների դեպքերին։

Պաշտոնական Բաքուն նշել է, թե Հարավային Կովկասում հակամարտության ավարտից հետո նոր իրողություններ են ի հայտ եկել, «որոնք յուրաքանչյուրը պետք է ընդունի» 

«Հայաստանը պետք է ընտրություն կատարի տարածաշրջանային համագործակցության և իր հարևանների նկատմամբ անօրինական և չհիմնավորված տարածքային պահանջների միջև։ Այս տեսանկյունից միջազգային հանրությունը պետք է դրական դերակատարություն ունենա և Հայաստանին կոչ անի գիտակցել, որ խաղաղությանն այլընտրանք չկա։ Պետք է վերջ դնել Հայաստանում ռևանշիզմին ուղղակիորեն կամ անուղղակիորեն աջակցելու և զինելու փորձերին»,- հայտարարել են Ադրբեջանի արտաքին գերատեսչությունից։ Նկատենք, որ հենց Ադրբեջանն է իրականում վարում ագրեսիվ քաղաքականություն եւ արդեն քանի ամիս է, ինչ մխրճվել է ՀՀ սուվերեն տարածք ու զբաղված է թալանով ու ռեկետով. Գորիս-Կապան ճանապարհին գումարներ է պահանջում իրականական բեռնատարների վարորդներից, թեեւ այն չի գտնվում Ադրբեջանի՝ միջազգայնորեն ճանաչված սահմանների մեջ, պարբերաբար կրակոցներ  արձակում Գեղարքունիքի ու Սյունիքի  սահմանամերձ բնակավայրերի ուղղությամբ, հափշտակում բնակիչների խոշոր եղջերավոր անասուններին։ 

Աղբյուր` Փաստինֆո