Փաստ ինֆո

Շքանշաններով, մեդալնեով պարգևատրելը դրամական պարգևավճարների մակարդակի իջեցրեցին։ Քիչ առաջ «Հայաստան» դաշինքի հրավիրած հանրահավաքի ժամանակ այս մասին ասաց ԱԺ «Հայաստան» խմբակցության ղեկավար Սեյրան Օհանյանը։ 

«Չափազանց դժվար պայմաններում ենք այսօր գտնվում, բայց այս ամենից ելք կա։ Առաջին հերթին ԱԽ-ն պետք է բոլոր ուժերն օգտագործեր և վերանայում աներ, որի ընթացքում կորոշվեր յուրաքանչյուր պետական կառույցի, գերատեսչության դերը, նշանակությունը և գործողությունները։ Այդ դեպքում այսօրվա իշխանություններից շատերը չէին ասի, որ թող ուսանողները վերցնեն ինժեներական սարքավորումները, բահերը և գնան սահման՝ խրամատներ փորելու։ Նրանք կիմանային, որ պետությունն ունի այդ բոլոր հնարավորությունները, ինժեներական և շինարարական ամբողջ ներուժը, որ սահմանը կահավորեն։ Նրանք դա չեն արել»,-նշեց Սեյրան Օհանյանը։

Վերջինս նկատեց՝ փոխվել է անվտանգության միջավայրը, բայց այս իշխանությունները բանական ամրապնդելու փոխարեն այլ բան են անում։ Սեյրան Օհանյանի խոսքով՝ նրանք քանդում են բանակը։

«Ի՞նչ է նշանակում այս դժվար վիճակում անցնել 1.5 տարվա ժամկետային ծառայության կամ 5 տարին մեկ մոբիլիզացիա անել։ Այդպես հնարավոր չէ։ Նայում ես հակառակորդին, պարբերաբար նոր զորանոցներ, նոր դիրքեր են կառուցում։ Ի՞նչ ենք տեսնում այստեղ, ոչ մի բան, որովհետև բանակին հստակ առաջադրանք չկա։ Սպառազինությունը և այն յուրացնելը, դրանք զորավարժությունների, ամենօրյա պատրաստության արդյունքում կատարելագործման հասցնելն ամենակարևոր գործողություններից մեկն է։ Մեր ժամանակ ամենահզոր զորավարժություններն են անցկացվել։ Մի՞թե մեր բանակն ի վիճակի չէ պատրաստության և մարտունակության աստիճանը բարձրացնելու համար խոշոր զորավարժություններ անել։ Բանակն այսօր ի վիճակի է դիմադրել, պարզապես առաջադրանքներ չկան»,-ասաց Սեյրան Օհանյանը։

Աղբյուր` Փաստինֆո