Փաստ ինֆո

«Ասել՝ ինչ ասել կատարել ենք, սխալ է։ Պետք է նաև համապատասխան հսկողություն իրականացվեր»,- այս մասին հայտարարել է «Հայաստան» խմբակցության ղեկավար Սեյրան Օհանյանն՝ անդրադառնալով Նիկոլ Փաշինյանի հայտարարությանը, թե վերջինիս կառավարման օրվանից սկսած բանակն ինչի անհրաժեշտություն ունեցել է, իրենք գնել են

Սեյրան Օհանյանը հայտարարեց, որ պետական ծրագրով սպառազինության և ռազմական տեխնիակայի մատակարարումները բոլոր ժամանակահատվածներում՝ ՀՀ երեք նախագահների և պաշտպանության նախարարների օրոք եղել են։ Յուրաքանչյուր սադրանք հակառակորդի կողմից որոշակի ճշգրտումներ են մտցրել այդ ծրագրում։ Նման փոփոխություններ, ըստ ՊՆ նախկին ղեկավարի, եղել է օրինակ՝ 2016 թվականի ապրիլյան գործողությունների ժամանակ։

«Առաջնային գնել ենք այն կարևոր իրերը որոնք հարկավոր էին։ Օրինակ՝ զինվորին հանդերձանք, մեծ քանակությամբ սաղավարտներ, զրահաբաճկոններ, ինչը այս պատերազմի ժամանակ բացակայում էր։ Երկրորոդը գնել ենք ավիացիոն կոմպոնենտի հետ կապված հետախուզական և հարվածային ԱԹՍ-ներ։ Այդ ծրագրի մեջ նրանք փոփոխություններ են մտցրել»։

Սեյրան Օհանյանի կարծիքով, Ավիացիոն կոմպոնենտի զարգացումը միշտ էլ ԶՈՒ-երի կարևոր ուղղություններից մեկն է եղել, բայց այն պետք է իրականացվի համահունչ այն բոլոր խնդիրներին, որոնք որ կան ու համապատասխանի մարտական խնդիրներ կատարելու կարողություններ։ Ըստ Օհանյանի՝ ՍՈՒ 30-երի գնումը ենթադրում էր նաև որոշակի հսկողություն։

«Եթե դու գնում ես ռազմական միջոցներ՝ ռազմամթերք, բայց դա ամբողջովին չէ, ամբողջովին չէ նաև հետախուզական, ռադիոէլեկտրոնային կապի հետ կապված հարցերը և այդ միջոցները սպառազինությամբ հանդերձավորված չեն, դրանց արդյունավետությունն իջնում է։ Ասել՝ ինչ ասել կատարել ենք, պետք է նաև համապատասխան հսկողություն իրականացվեր, մանավանդ, որ նաև տվյալ միջոցի համար պատրաստի օդաչուներ պետք է լինեն՝ ընդ որում բարձրակարգ»,- հավելեց Օհանյանը։

Սեյրան Օհանյանը՝ հակադարձելով Նիկոլ Փաշինյանին, ասաց, որ ԶՈՒ բյուջեն չի ավելացել։

«Նախկինում միջպետական վարկերը, որոնք հատկացվում էին ՌԴ-ից ՀՀ Զինված ուժերին, չէին մտնում բյուջեի մեջ։ Այսօր այդ վարկերը և վարկերը ապահովող գումարները մտնում են ԶՈՒ բյուջեի մեջ։ Այդքան էլ չեն ավելացրել»։

Օհանյանը նշեց, որ բյուջեի ավելացումներն անընդհատ են եղել։ Պաշտպանության նախկին նախարարը նշեց, որ ընդունելով պաշտոնը, նախարարության բյուջեն եղել է 110 միլիարդ, իսկ 2016 թվականին՝ հանձնելու ժամանակ 110 միլիարդ եղել է միայն ԶՈՒ աշխատավարձերի ֆոնդը։

Աղբյուր` Փաստինֆո