Փաստ ինֆո

Արցախում ադրբեջանական կրակոցից զոհված և վիրավորված քաղաքացիները Ստեփանակերտի բնակիչներ էին։ Նրանք ջրմուղի աշխատակիցներն էին, որոնք առավոտյան սովորականի նման գնացել էին աշխատանքի։ Նրանցից մեկը էքսկավատորի վարորդ էր, երեքը՝ բանվոր։ Ջրագծի մոտ շինաշխատանքների ժամանակ թիրախային կրակոցից աշխատակիցներից երեքը ծանր վիրավորում են ստացել, իսկ 22-ամյա աշխատակիցը՝ ստացած վնասվածքներից՝ մահացել։

«Փաստինֆո»-ի հետ զրույցում Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը տեղեկացրեց, որ վիրավորների մասին տեղեկություն է փորձել ստանալ հիվանդանոցից։

«Մեկը տեղում մահացել է՝ բուժօգնություն չեն հասցրել ցույց տալ։ Երեքը՝ չնայած լուրջ վնասվածքներ են ստացել՝ կյանքին վտանգ սպառնացող, բայց, փառք Աստծո, ցուցաբերված բժշկական օգնության արդյունքում նրանց կյանքին վտանգ չի սպառնում։ Իրականում այստեղ բժիշկները մեկ տարի այնպիսի հրաշքներ են գործում, ուղղակի մարդուն փրկում են, սա էլ այդ դեպքերից մեկն է»։
Հակոբյանը տեղեկացրեց նաև, որ դեպի Հայաստան տանող ճանապարհը դեպքի պատճառով փակ էր, սակայն երթեւեկությունն արդեն վերականգնվել է։
«Այն հատվածը, որտեղ եղել է միջադեպը ճանապարհի վրա է ու շատ փոքր հեռավորության վրա՝ Ստեփանակերտից։ Ջրմուղի աշխատողներն էին իրենք, ընդամենը ջրագծի վրա աշխատելիս են եղել»։

Ադրբեջանական կողմը, հստակ իմանալով, որ տեղում աշխատում են քաղաքացիներ, կրակ է բացել հենց այն ժամանակ, երբ Շուշիում էր Ադրբեջաննի նախագահը։

«Նոյեմբերի 9-ի հրադադարից հետո մենք խաղաղ, այսինքն` երբ կրակոց չի եղել, մեկ տարվա կտրվածքով մեկ շաբաթ էլ չենք ունեցել։ Իրենք պատահական երբեք որևէ քայլ չեն արել։ Իրենք դա հատուկ են արել և մեկ տարվա ընթացքում նպատակը եղել է տիրոջ իրավունք հաստատել մեր վերահսկողության տակ գտնվող տարածքի վրա»։

Հակոբյանը կարծում է, որ Ադրբեջանի հաջորդ նպատակն է՝ խուճապ առաջացնելով հայաթափել Արցախը։ Հատկապես Արցախում դրա վրա որևէ մեկը չի զարմանում։
Այս համատեքստում պատգամավորը զարմանք է հայտնել հատկապես Հայաստանի իշխանության հայտարարությունների առնչությամբ, թե պետք է միասին ապրեն խաղաղ։

«Արցախում չեք գտնի մեկ հայ, որ կարող է սովորել ապրել կողք կողքի, առավել ևս անունը դնել խաղաղ։ Մենք նախահարձակ չենք լինում, բայց ամեն անգամ թիրախի տակ ենք։ Մենք այսօր Արցախում ապրելով գիտակցում են, որ մեր ամբողջ շարժը տեսնում են, նույնիսկ տեսնում են՝ մենք մեր տներում ի՞նչ ենք անում։ Մենք այսօր ապրում ենք գիտակցելով, որ միայն այդ կերպ կպահենք հայրենիքը, ուղղակի շատերը չեն դիմանում։ Այսօր Արցախցի տղամարդն այն վիճակում է, որ հասկանում է 90-ականներին իր ձեռքով կերտած հաղթանակով այսօր չի կարողանում իր սեփական երեխայի անվտանգության երաշխավորը լինել»։

Հակոբյանը նշեց, որ այսօրվա միջադեպի մեղավորը Արցախի իշխանությունն է, պետք է տարբերակել ռուս խաղաղապահների գործառույթները և Արցախի իշխանությունների՝ որպես բնակիչների անվտանգության հովանավորի գործառույթները։

«Ռուս խաղաղապահներն իրենք տարածաշրջանում խաղաղություն են ապահովում, իրենք չեն կարող պատասխան կրակ բացել։ Իրենք հետաքննություն են անում, գնահատական տալիս, ավելի խստացնում հսկողությունը տարածքում»։

Պատգամավորի դիտարկմամբ՝ խաղաղապահների ներկայությունը նաև պետք է լինի կանխարգելիչ գործոն, որպեսզի չլինեն նմանատիպ դեպքեր, սակայն, ցավոք, կան և գուցե ռուսական կողմն էլ լավ չի պատկերացնում՝ ինչ է նշանակում ադրբեջանցի։

«Իսկ որ պատասխանատվությունը միանշանակ պետք է կրի Արցախի իշխանությունը, ես չեմ տեսնում ուրիշ տարբերակ։ Իրենք ուղղակի շատ լավ ձևը գտել են։ Արցախի և Հայաստանի իշխանություններից մեկը դարձել է շինարար, մյուսը՝ պոպուլիստ ու մնացած բոլոր հարցերը բարդել են խաղաղապահների ուսերին ու այսօր որևէ պատասխանատվություն չեն կրում, բայց այսօր ուղղակի չորս ստեփանակերտցի արթնացել էր, դուրս եկել օրվա աշխատանքը կատարելու՝ ընդամենը ջրմուղի աշխատողներ, որոնք կապ չունեն պատերազմի հետ ու դարձել զինված հարձակման թիրախ»։

Փոխարենը Արցախի նախագահը ավելի կարևոր գործ է անում՝ ցույց է տալիս բնակչությանը, թե պատվաստվել է, իսկ միաժամանակ ադրբեջանական կողմն ուղղակի սպանել է խաղաղ բնակիչներին։

«Երբ մենք անդադար ասում էինք, որ պարոն Հարությունյան, դու միայն լավ առևտրական ես, քաղաքական ու ռազմական գործիչ չես, ինքը հեքիաթներ էր պատմում, թե ինչպես է 17 տարեկանում Շուշի ազատագրել, մի մարդ, որ գաղափար չունի՝ ինչ է պատերազմը։ Այսօր այդ մարդը շարունակում է վտանգել արցախցիների կյանքը։ Արտագաղթի պատճառը իր ու Նիկոլ Փաշինյանի պատճառով է։ Առանց աչք թարթելու 5000 հոգու դրեցին հողի տակ ու չեն պահելու կենդանի մնացած երեխաների կյանքը։ Բոլորը դա գիտակցում են ու շատերը թողնում գնում են այդ պատճառով։ Հայկական կողմը թող չբարդի ռուս խաղաղապահների վրա»,- եզրափակեց Հակոբյանը։

Աղբյուր` Փաստինֆո