Փաստ ինֆո

Արցախյան առաջին պատերազմի հաղթանակից հետո մեր բանակցային դիրքերը խարսխված էին մեր հաղթանակների վրա։ Դա մեզ ուժ էր տալիս բանակցային ամբողջ գործընթացում։ Հանրահավաքի ժամանակ այս մասին ասաց ՀՀ երկրորդ նախագահ, «Հայաստան» դաշինքի ղեկավար Ռոբերտ Քոչարյանը։

«Մենք քայլ առ քայլ արձանագրում էինք դիվանագիտական հաղթանակներ։ Հիմա այլևս այդ առավելությունները չկան, քանի որ մեկ մարդ որոշել է, որ բանակցությունները սկսելու է զրոյական կետից, ուրեմն ինքը պետք է զրոյացներ մեր բոլոր բանակցային առավելությունները, մեր հաղթանակած առավելությունները։ Հիմա ի՞նչ են բանակցելու։ Բանակցությունները հաջողված են լինում, երբ հենվում են փոխզիջումների վրա։ Հիմա մենք ի՞նչ ունենք փոխզիջելու. ոչինչ չի մնացել»,-նշեց Ռոբերտ Քոչարյանը։

Վերջինս անդրադարձավ սահմանազատման, սահմանագծման գործընթացին և Սյունիքով միջանցք տրամադրելուն։ Ռոբերտ Քոչարյանը նշեց՝ սահմանազատումը նշանակում է, որ ուղղակի կամ անուղղակի, բայց փաստացի ճանաչում ես Ադրբեջանի տարածքային ամբողջականությունը և ֆիքսում ես Ղարաբաղի անկլավային վիճակն Ադրբեջանի ներսում։

«Սա ուղղակի Ղարաբաղի հարցի կարգավորման վերջն է լինելու։ Սա նշանակում է, որ մնալու է մեկ լուծում՝ Ղարաբաղի կարգավիճակն Ադրբեջանի կազմում։ Այլ լուծում դելիմիտացիան ուղղակի չի թողնելու։ Այդ դելիմիտացիան իրականացնելուց հետո Ադրբեջանը լեգիտիմ իրավունք է ստանալու ցանկացած պահի Հայաստանը Ղարաբաղին կապող ճանապարհի վրա դնել իր սահմանապահներին, իր մաքսային կետն ու վերահսկել ամբողջ շարժը։ Ճիշտ այնպես, ինչպես արեց այսօր Գորիս-Կապան ճանապարհի վրա»,-նշեց Ռոբերտ Քոչարյանը։

Աղբյուր` Փաստինֆո