Փաստ ինֆո

Սյունիքի մարզի ընդհանուր իրավասության դատարանում՝ դատավոր Գնել Գասպարյանի նախագահությամբ, մեկնարկել է Գորիսի քաղաքապետ Առուշ Առուշանյանի, Լուսինե Ավետյանի և մյուսների վերաբերյալ քրեական գործով դատական նիստը։

Ինչպես արդեն տեղեկացրել ենք՝ նախորդ դատական նիստին Առուշանյանի պաշտպանները միջնորդություն էին ներկայացրել՝ պահանջելով վերացնել Առուշանյանի տեսակցությունների և հեռախոսազանգերի սահմանափակումները, սակայն այն չի քննարկվել, քանի որ Առուշ Առուշանյանի և Լուսինե Ավետյանի վերաբերյալ բոլոր քրեական գործին միացվել է Առուշանյանի վերաբերյալ մյուս քրեական գործը, ուստի դատական նիստը հետաձգվել էր՝ մեղադրող կողմին միջնորդության վերաբերյալ դիրքորոշում հայտնելու հնարավորություն տալու համար։

«Փաստինֆո»-ի թղթակցի հաղորդմամբ՝ Առուշանյանին դատարանում դիմավորեցին ծափողջույններով։ Այսօրվա դատական նիստին կքննարկվի սույն միջնորդությունը, ինչից հետո դատարանը կանցնի դատաքննության փուլ։ Նախատեսված է, որ այսօր դատախազը կհրապարակի մեղադրական եզրակացությունը, ինչից հետո կորոշեն ապացույցների հետազոտման կարգը։ Բացի այդ պաշտպանության կողմը կբարձրացնի Առուշ Առուշանյանի նկատմամբ ընտրված խափանման միջոց կալանավորումը գրավով փոխարինելու, կամ Առուշանյանին անձնական երաշխավորությամբ ազատ արձակելու հարցը։ Առուշանյանի համար երաշխավորություն կներկայացնեն «Հայաստան» խմբակցության պատգամավորները, որոնք այս պահին արդեն դատարանում են։

Ի դեպ, Սյունիքի մարզի ընդհանուր իրավասության դատարանի շենքի դիմաց առավոտվանից բավականին բազմամարդ է։ Առուշանյանի մարտական ընկերները, հարազատները, նրա աջակիցները գտնվում են դատարանի բակում՝ իրենց աջակցությունը հայտնելու համար։

Հիշեցնենք, որ ի սկզբանե դատավոր Գնել Գասպարյանի վարույթում է եղել արտահերթ խորհրդարանական ընտրությունների ավարտից հետո հարուցված քրեական գործը՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ, ընդ որում, ըստ ՀՔԾ-ի, որպես ընտրակաշառք է ներկայացվել դրամական աջակցությունը։ Սույն գործի շրջանակներում հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։ Մյուս քրեական գործը, որը միացվել է սույն վարույթին, ավելի վաղ է ուղարկվել դատարան և քննվում էր Սյունիքի մարզի ընդհանուր իրավասության դատարանի նախագահ Նապոլեոն Օհանյանի վարույթում։

Սույն գործով որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն:

Հեղինակ՝ Իզաբել Սահակյան

Աղբյուր` Փաստինֆո