Փաստ ինֆո

Գորիսի համայնքապետ Առուշ Առուշանյանի գործով պաշտպանները պահանջում են վարույթից հեռացնել տուժողի իրավահաջորդի ներկայացուցիչ Ներսես Խաչատրյանին, քանի որ վերջինս Առուշանյանի վերաբերյալ քրեական գործով ներգրավված է որպես վկա։

«Փաստինֆո»-ի թղթակցի հաղորդմամբ՝ Սյունիքի մարզի ընդհանուր իրավասության դատարանում՝ դատավոր Գնել Գասպարյանի նախագահությամբ, այսօր սկսվել է Առուշ Առուշանյանին առնչվող քրեական գործերի միացված վարույթի քննությունը , դատարանը ևս մեկ անգամ պարզեց գործով կողմերի ինքնությունը։

Ինչպես արդեն տեղեկացրել ենք, Առուշանյանի և Լուսինե Ավետյանի վերաբերյալ քրեական գործին է միացվել Առուշանյանին առնչվող մյուս գործերը եւս, ինչի արդյունքում մեղադրյալների թիվն ավելացել է ևս երեքով, կա նաև տուժողներ։

Դատավարությանը ներգրավված անձանց ինքնությունը պարզելու արդյունքում ի հայտ եկավ տուժողի իրավահաջորդի ներկայացուցիչ Ներսես Խաչատրյանի մասնակցությունը սույն վարույթին բացառող հանգամանք։ Բանն այն է, որ գործերից մեկով Խաչատրյանը ներկայացնում է տուժողի շահերը, իսկ մյուս գործով՝ ցուցմունք է տվել որպես վկա, հետևաբար, պաշտպանության կողմը գտնում է, որ վերջինս չի կարող մասնակցել դատավարությանը։ Պաշտպան Էրիկ Ալեքսանյանի դիտարկմամբ՝ քրեական դատավարության օրենսդրությունը չի նախատեսում, որ քրեական վարույթի շրջանակներում անձը կարող է ունենալ երկու դատավարական կարգավիճակ։ Միևնույն ժամանակ, պաշտպանության կողմը գտնում է, որ Խաչատրյանի՝ վարույթից հեռացման հարցը կարող է քննարկվել նաև դատավարության հաջորդ փուլում։

Դատարանը հեռացել է խորհրդակցական սենյակ՝ որոշում կայացնելու։

Հիշեցնենք, որ ի սկզբանե դատավոր Գնել Գասպարյանի վարույթում է եղել արտահերթ խորհրդարանական ընտրությունների ավարտից հետո հարուցված քրեական գործը՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ, ընդ որում, ըստ ՀՔԾ-ի, որպես ընտրակաշառք է ներկայացվել դրամական աջակցությունը։ Սույն գործի շրջանակներում հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։

Մյուս քրեական գործը, որը միացվել է սույն վարույթին, ավելի վաղ է ուղարկվել դատարան և քննվում էր Սյունիքի մարզի ընդհանուր իրավասության դատարանի նախագահ Նապոլեոն Օհանյանի վարույթում։ Սույն գործով որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն:

Հեղինակ՝ Իզաբել Սահակյան

Աղբյուր` Փաստինֆո