Փաստ ինֆո

Դպրոցների արձակուրդների երկարացումը և բուհերում դասերի առցանց իրականացումը որոշակի դրական միտումներ ցույց են տալիս։ Հիվանդացության առումով նվազում ունենք։ Կառավարության նիստի ժամանակ ասաց ՀՀ առողջապահության նախարար Անահիտ Ավանեսյանը։

Մահճակալային ֆոնդն այս պահին էլ մնում է գերլարված վիճակում։ Նախարարի խոսքով՝ մի փոքր նվազում ունենք հոսպիտալացման սպասող քաղաքացիների շրջանում, բայց մահճակալները դեռ ոչ մի վայրկյան ազատ չեն մնում։

«Մահճակալային ֆոնդը մոտ է 3120-ին և աշխատանքներ ենք իրականացնում՝ լրացուցիչ մահճակալներ ներգրավելու ուղղությամբ։ Աշխատանքներ ենք իրականացնում թթվածնային ապահովության անխափան մատակարարում ապահովելու համար։ Այս պահին մեր բոլոր բժշկական հաստատություններն ապահովված են թթվածնով»,-ասաց Անահիտ Ավանեսյանը։

Անդրադառնալով պատվաստումներին՝ նախարարն ասաց, որ իրականացվել է 852 350 պատվաստում։ Առաջին դեղաչափը ստացել է 588 562 քաղաքացի, որը 29.4 տոկոսն է, իսկ երկրորդ դեղաչափը ստացել է 263 793 քաղաքացի, որը 13 տոկոսն է։

««Մոդեռնա» պատվաստանյութը ստանալուց հետո փոփոխություն իրականացրեցինք մեր հրամանի մեջ, և 12 տարեկանից բարձր երեխաները ևս այս պահին հնարավորություն ունեն պատվաստում ստանալու, ինչն իրականացվում է ծնողների գրավոր համաձայնությամբ։

Մենք 12 տարեկանից բարձր արդեն մոտ 50 երեխա պատվաստել ենք»,-ասաց Անահիտ Ավանեսյանը։

Հոսպիտալացված քաղաքացիների մեջ պատվաստվածների թիվը նախարարի խոսքով՝ փոքրաթիվ է։ Այս պահին 3000-ից ավելի հոսպիտալացված քաղաքացիներից 97-ն են պատվաստված։

ՀՀ վարչապետ Նիկոլ Փաշինյանն էլ ընդգծեց՝ լոքդաունների չենք գնալու. «Դիմակների պարտադիր կրումը պետք է հետևողականորեն պահենք, և պետք է մեծ ծավալներով պատվաստումներ իրականացնել»։

Աղբյուր` Փաստինֆո