Փաստ ինֆո

ՄԻՊ աշխատակազմի ֆինասավորումը ավելացել է 1.92%-ով: ՄԻՊ-ի գրասենյակի ծանրաբեռնվածությունն այս տարիներին ավելի է մեծացել և, ենթադրաբար ,հաստիքների համալրման ավելի շատ կարիք կար:Այս մասին խորհրդարանում բյուջեի քննարկման ժամանակ հայտարարեց «Պատիվ ունեմ» խմբակցության պատգամավոր Թագուհի Թովմասյանը և հարց ուղղեց Ֆինանսների նախարար Տիգրան Խաչատրյանին.

«Ինչո՞վ է պայմանավորված ֆինանսավորման ընդամենը 1.92%-ով աճը»:
Նախարարը պարզաբանեց՝ ինչպես մարդու իրավունքների պաշտպանի աշխատակազմի, այնպես էլ մյուս բոլոր գերատեսչությունների դեպքում բյուջեի նախագծում ներառված վերջնական ֆինանսական ցուցանիշներն արտացոլում են այն իրավական ակտերի ֆինանսական պատկերը, որոնք կայացված են.
«Այսինքն՝ եթե մենք խոսում ենք հաստիքակազմի մասին, ապա Ֆինանսների նախարարությունը բյուջեի նախագիծը քննարկելու փուլում իրավասու չէ քննարկել, թե որ պետական կառավարման մարմինը որքան հաստիքներ պետք է ունենա:Մենք միայն ստուգում և պետբյուջեի նախագծում արտացոլում ենք այդ կայացված որոշումներին համապատասխան իրավական ակտերով ամրագրված ֆինանսական ցուցանիշները»:

Թագուհի Թովմասյանը իր խոսքը հստակեցրեց թվային օրինակներով.

«Եթե մենք սպասում ենք իրավական ակտերին, ապա դրանք
պետք է լինեն հիմքերի վրա: Հիմքերից մեկը հետևայն է՝2018-ին ՄԻՊ գրասենյակին դիմել է 10 հազար 740 քաղաքացի, 2019-ին՝ 13 հազար 140 քաղաքացի, 2020-ին՝ 14 հազար 780 քաղաքացի»,-ասաց պատգամավորը և արձանագրեց, որ այս տարիներին շեշտակի աճել է ՄԻՊ-ին դիմող քաղաքացիների թիվը, հետևաբար, պետք է սպասարկել այդքան դիմումները:

«Դրանից ավել ի՞նչ հիմք է պետք, որ կառավարությունը համարժեք պատասխան տա այս իրավիճակին՝ բյուջեի կամ աշխատակիցների ներգրավման տեսքով», - ասաց պատգամավորը:

Տիգրան Խաչատրյանն էլ ասաց, որ եթե անգամ դիմումների քանակը մնար նույնը, սակայն հիմնավորվեր, որ եղած աշխատակազմը իր հաստիքային կազմով դիմումների բնույթի փոփոխության պատճառով ավելի մեծ ծավալի աշխատանք է կատարում, այդ հարցը կարող էր քննարկվել:

Աղբյուր` Փաստինֆո