Փաստ ինֆո

Հայաստանի պետական բյուջից 0 դրամ է ծախսվել Անկախության տոնի համար: Մենք երբ հնարավորություն ենք ունեցել, գործընկերների հետ ծրագիր ենք իրականացրել, որպեսզի լրացուցիչ ծանրաբեռնվածություն չլինի բյուջեին: Այս մասին խորհրդարանում բյուջեի քննարկման ժամանակ ասաց վարչապետի աշխատակազմի ղեկավար Արայիկ Հարությունյանն՝ արձագանքելով «Հայաստան» խմբակցության պատգամավոր Աղվան Վարդանյանին:

Ինչ վերաբերվում է «Քաղաքացու տոնին»՝ Արայիկ Հարությունյանն ասաց, պետք է ամեն տարի նշել տոնը , հնարավորության դեպքում անգամ բյուջեն ավելացնել.

«Ի տարբերություն ձեր իշխանության՝ քաղաքացին մեզ համար գերագույն արժեք է, քաղաքացին է, որ ցույց է տալիս, յուրաքանչյուրիս տեղը քաղաքական կյանքում: Մենք չենք կարող նշել օլիգարխի տոն և չենք նշելու, չենք նշելու բյուջեից գումարներ հափշտակելու տոն, սա այլ արժեհամակարգ կրող քաղաքական ուժերին է բնորոշ, մենք նշելու ենք քաղաքացու տոնը՝ ավելի մեծ շուքով»,-ասաց Արայիկ Հարությունյանը:

Աղվան Վարդանյանն էլ արձագանքեց՝ թե սովոր չէ քննարկումները վերածել քաղաքական «չգիտեմինչերի».

«Թույլ եք տալիս ձեզ, թույլ տվեք: Դրանով է տարբերվում քաղաքական մարդը պատահական մարդուց:

Ասում եք՝ ոչ մի կոպեկ չեք ծախսել Անկախության տոնի համար, բայց թվերը հրապարակված են, գուցե բյուջեից չեք ծախսել, բայց այդ 1 մլրդը ծախսել եք մասնավոր միջոցներից, կազմակերպել եք գունագեղ միջոցառում, բոլոր ուսումնասիրությունները ցույց են տալիս, որ այդ օրը ծախսվել է առավելագույնը 400-ից 450 միլիոն դրամ: Գումարներն ինչ են եղել՝ չգիտեմ, ովքեր են այդ ծախսերն իրականացրել, կարծում եմ՝ հանրայնացնելու ձևերը կան, ու ինչ առնչություն ունի աշխատակազմի ղեկավարը այդ միջոցառման կազմակերպիչների հետ, ևս հայտնի է», - ասաց պատգամավորը:

Արայիկ Հարությունյանն էլ ասաց, թե Աղվան Վարդանյանը իրավական առումով կարող է խնդիրներ ունենալ, եթե չհրապարակի աղբյուրներն ու իր առնչությունը ֆինանսավորողների հետ:

«Խնդրում եմ դա անել, այլապես այլ հարաբերություններում կճշտենք այդ հարցը», - ասաց Արայիկ Հարությունյանը:

Աղբյուր` Փաստինֆո