Փաստ ինֆո

«Հայաստան» խմբակցության պատգամավոր Աղվան Վարդանյանը 2022թ-ի պետական բյուջեի քննարկման ժամանակ ասաց, որ նախագահի միայն արտասահմանյան գործուղումների համար նախատեսված է 425 մլն դրամ և հետաքրքրվեց՝ նկատի ունենալով նախագահի սահմանափակ լիազորությունները՝ արդյո՞ք այս գումարները շատ չեն և ի՞նչ արդյունավետություն ունի դրանց ծախսումը:

Պատգամավորը նաև նշեց, որ ԱԺ-ում պարգևատրումների, դրամական խրախուսումների, քաղաքացիական, դատական, պետական այլ ծառայողների գումարները կազմում են ընդհանուր աշխատավարձի գումարների մոտ 20-22%-ը.

«Մենք շարունակելո՞ւ ենք այս նույն գործելաոճը պարգևատրումները, խրախուսումները՝ հակասության մեջ մտնելով օրենսդրության հետ»,-հետաքրքրվեց պատգամավորը:

Աղվան Վարդանյանը նաև հայտարարեց, որ «Քաղաքացու օրը» նշելու համար բյուջեից հատկացվելու է 40 միլիոն դրամ.

«Անիմաստ ծախսերից բյուջեն չի՞ ուզում ազատվել արդյոք», -հարցրեց նա:

Տիգրան Խաչատրյանն էլ նշեց, որ այն հարցերը, որոնք վերաբերվում են ծրագրերին և միջոցառումներին, այդ հարցերի պարզաբանումները կտան միայն պատասխանատու անձինք.

«Թե որքանո՞վ են այդ միջոցառումները անհրաժեշտ, դրանք համապատասխան ոլորտում լիազորված անձանց պատասխանատվության ու մեկնաբանությունների առարկան են»:

Իսկ ինչ վերաբերվում է պարգևավճարներին, նախարարը վստահեցրեց, որ բոլոր պարգևավճարները և հավելումները օրենսդրությամբ սահմանված կարգով են հաշվարկված, իսկ Ֆինանսների նախարարության կողմից պետական բյուջեի մասին օրենքի նախագիծն ամփոփելու ժամանակահատվածում բոլոր դեպքերում, երբ եղել են որևէ ծախսային հաշվարկներ, որոնք շեղվում են նորմատիվային կարգավորումներից, դրանք տեղ չեն գտել բյուջեի մասին օրենքի նախագծում:

Աղբյուր` Փաստինֆո