Փաստ ինֆո

Շտապօգնության վարորդների բողոքի ակցիան թեժացել էր։ Նրանցից վերցրել էին մեքենաների բանալիները։ Ենթակայանի վարիչը լրագրողների հետ զրույցում նշեց, որ բանալիներն իր մոտ են, վարորդները հրաժարվում են կանչի գնալ։ Ենթակայանի բակում հավաքված վարորդներն էլ պնդում են, որ իրական ծանր կանչի դեպքում պատրաստ են քաղաքացիներին օգնել։ Ենթակայանի վարիչը տեղեկացրել է նաև, որ խնդրել են 1.03-ին օգնության հասնել, քանի որ իրենց վարորդները կանչերը չեն սպասարկում։

«Եթե կանչ գա, վարորդն ասի, որ ինքը գնում է, բանալին կտրամադրեմ»։ Վարորդները պնդում են, որ այսօր ծանր կանչեր չեն եղել։ Արդեն առաջին կանչից հետո բանալիները հավաքել են ու դրանք հիմա տնօրինության մոտ են։

Որոշ ժամանակ անց, բողոքի ակցիային միացան նաև շտապօգնության 7-րդ ենթակայանի վարորդները։ Աշխատանքն ավարտելուն պես կմոտենան նաև մյուս վարորդները։ Արմեն Վարդանյանը նշեց, որ իրենք ևս գիշերը 35 կանչ են իրականացրել։ Հաց ուտելու ու հանգստանալու ժամանակ չունեն։

Տեղում աշխատող լրագրողները հեռավար կապ հաստատեցին «Շտապօգնություն» ՓԲԸ տնօրեն Թագուհի Ստեփանյանի հետ, որը նշեց, որ ոչինչ չի կարող անել։ Տեղյակ չէր բողոքի ակցիայից ու եթե նախարարությունը ճիշտ գտնի բարձրացնել վարորդների աշխատավարձը, դա կանի։

«Աշխատավարձի բարձրացողը ես չեմ։ Վերջին անգամ նրանց աշխատավարձը բարձրացել է 2020 թվականի հունվարին՝ 10 տոկոսով։ Կորոնավիրուսի ժամանակ երեք անգամ ստացել են պարգևավճար։ Յուրաքանչյուր աշխատակից, որ գալիս ընդունվում է աշխատանքի, ստորագրում է պայմանագիր ու նախապես գիտի՝ ինչ աշխատանք է կատարելու ու ինչ աշխատավարձ է ստանալու։ Յուրքանչյուրն է որոշում ՝ ցանկություն ունի՞ աշխատելու թե ոչ»։

Վարորդների պնդմանը, որ աշխատանքի ընդունվելիս 10-12 կանչ են սպասարկել, իսկ հիմա դրանց թիվը հասնում է 2000-ի, տնօրենը նշեց, որ նման բան չկա։ Ըստ Ստեփանյանի, բոլոր ենթակայանների կանչերը կատարելու են այն վարորդները, որոնք ցանկություն կունենան աշխատելու։ Տնօրենն այս պահին քայլեր չի ձեռնարկում՝ հանդիպելու բողոքի ակցիա իրականացնող վարորդների հետ։

«Իրենք ակցիա անելիս ինձ եկել ասե՞լ են, որ ակցիա են անելու»,- ասաց տնօրենը։

Աղբյուր` Փաստինֆո