Փաստ ինֆո

Ֆինանսների նախարար Տիգրան Խաչատրյանը ներկայացրել է արդյունաբերության, էներգետիկայի և բնական պաշարների, տրանսպորտի և կապի, տեղեկատվական տեխնոլոգիաների, հանրային ծառայությունների կարգավորման, տնտեսական մրցակցության պաշտպանության, անշարժ գույքի կադաստրի, քաղաքաշինության և ջրային տնտեսության ոլորտների եկամուտների և ծախսերի ցուցանիշները:

Այսպիսով՝ Էկոնոմիկայի նախարարության բյուջեն նախատեսվում է ավելացնել 26.9 տոկոսով: Տիգրան Խաչատրյանը նշեց, որ այս ոլորտում ներկայացված է 13 ծրագիր, որում ընդգրկում է 56 միջոցառում: Էկոնոմիկայի նախարարությունում 2022-ի պետբյուջեի նախագծով նախատեսված է 41 մլրդ 8 մլն դրամ ծախսեր, որոնք 2021-ի համեմատ ավելի են 26.9%-ով:

Տարածքային կառավարման և ենթակառուցվածքների նախարարության բյուջեն նախատեսվում է ավելացնել 31.6 տոկոսով: Ներկայացված է 22 ծրագիր, որոնք ընդգրկում են 129 միջոցառում: 2022թ-ի պետբյուջեի նախագծով նախարարության համար նախատեսված են 278 մլրդ 590 մլն դրամի չափով ծախսեր, աճը 2021-ի նկատմամբ կազմում է 31.6 տոկոս:

Բարձր տեխնոլոգիական արդյունաբերության նախարարության բյուջեն նախատեսվում է ավելացնել 89.4 տոկոսով.

«Նախագծով նախատեսված է 17 մլրդ 278 մլն դրամ, որը 2021-ի՝ 9 մլրդ 123 մլն դրամի նկատմամբ ավելի է 8 մլրդ 155 մլն դրամով, կամ աճը կազմում է 89.4 տոկոս»,- ասաց նախարարը:

Հանրային ծառայությունները կարգավորող հանձնաժողովին բյուջեի նախագծով նախատեսված է հատկացնել  859,9 մլն դրամ:

Կադաստրի կոմիտեին նախատեսված է՝ 4 մլրդ 997 մլն դրամ՝ 7 միջոցառում ընդգրկող մեկ ծրագիր իրականացնելու նպատակով:

Տնտեսական մրցակցության պաշտպանության պետական հանձնաժողովը 2022 թվականին իրականացնելու է մեկ ծրագիր մեկ միջոցառմամբ՝ 544,3 մլն դրամ ֆինանսավորման ծավալով:

Քաղաքաշինության կոմիտեին ուղղված ֆինանսավորման ծավալը 1 մլրդ 585 մլն դրամ է՝ 5 միջոցառումներ ընդգրկող 1 ծրագիր իրականացնելու համար:

2022 թվականին ՊԵԿ-ը  իրականացնելու է 1 ծրագիր 11 միջոցառումներով։  Բյուջեի նախագծով նախատեսվել է 33 մլրդ 802 մլն դրամ:

ֆինանսների նախարարությանը 15 միջոցառումներից բաղկացած 4 ծրագիր իրականացնելու համար տրամադրվելու է 218,4 մլրդ դրամ:

Աղբյուր` Փաստինֆո