Փաստ ինֆո

«Շտապօգնություն» ՓԲԸ ընկերության գլխավոր հաշվապահ Լեռնիկ Ալեքսանյանը տնօրինության անունից եկել էր հանդիպելու աշխատավարձից բողոքող վարորդներին։ Հաշվապահը փորձում էր հասկանալ աշխատակիցների պահանջը։ Ալեքսանյանը լրագրողների հետ զրույցում նշեց, որ աշխատավարձի բարձրացման համար խոսակցություն եղել է 2019 թվականի նոյեմբերին և վարչապետի հրահանգով 2020 թվականի հունվարի մեկից 10 տոկոս աշխատավարձի բարձրացում է եղել։

«Աշխատավարձը եղել է 111 հազար դրամ, հաշվարկային աշխատավարձը մեկ հերթապահության համար 16 հազար դրամ է, պահումներից հետո կազմում է 11-12 հազար դրամ»։

6-րդ ենթակայանում աշխատում է 15 վարորդ, որոնց 50 տոկոսը, ըստ հաշվապահի, մեկ-երկու տարվա աշխատանքային ստաժ ունեն։ Վերջինս պնդեց, որ անձինք, որ եկել են աշխատելու ծառայությունում, ծանոթացել են աշխատավարձի չափին, պայմաններին, ապա կնքել են պայամագիր։

«Պանդեմիայի հետևանաքվ աշխատանքը ծանրացել է, բայց մեր աշխատանքային կանոնակարգով վճարումը կատարվում է ժամային աշխատավարձով և որևէ սահմանափակում չունենք, թե անձը քանի՞ կանչ պետք է կատարի։ Աշխատանքը ժամավճարով է։ Համարում եմ, որ աշխատավարձը քիչ է մեր հանրապետությունում, բայց դա ԱԺ-ում հաստատվող բյուջեի սահմանում շտապօգնության համար տրամադրված ֆոնդն է։ Չափ գոյություն ունի, որի սահմանաններում աշխատավարձ ենք վճարում, նյութական ձեռքբերում իրականացնում»։

Ըստ Ալեքսանյանի, ամբողջ բյուջեի 85 տոկոսը կազմում է աշխատավարձը։ Միայն մայրաքաղաքում 950 աշխատող կա։ Վարորդները ներքին համատեղությամբ աշխատելու իրավունք ունեն՝ շաբաթական 36 ժամ առողջապահական ընկերություններում կարող են աշխատել, թույլ են տալիս վարորդներին 6-7 հերթապահության փոխարեն աշխատել 10 հերթապահություն՝ գումար վաստակելու համար։

Տնօրինության անունից հաշվապահը խնդրեց աշխատողներին՝ հիմք ընդունել աշխատանքային օրենսգիրքը, որով շտապ և անհետաձգելի բուժօգնություն իրականացնող ընկերությունում գործադուլն արգելված է։ Վարորդները պարտավոր էին 3 օրվա ընթացքում տեղեկացնել պահանջների մասին։

«Խնդրում ենք գրավոր պահանջ ներկայացնել, որը կքննարկենք նախարարության հետ, չնայած հաստիքացուցակը հաստատված է, այլապես գործատուին իրավունք է վերապահված հրավիրել այլ վարորդների և աշխատանքն իրականացնել։ Եթե վարորդները հրաժարվում են, ապա գործատուն պարտավոր է ապահովել նվազագուն գործունեությունը»։

Կենտրոնակայանի վարիչ Նիկոլայ Սարգսյանը նշեց, որ պետք է բողոքի ակցիա իրականացնող վարորդների փոխարեն այլ վարորդների հրավիրել, սակայն հույս ունի, որ բողոքող վարորդները գրավոր պահանջը կներկայացնեն, հասկանում է պահանջը, բայց կարծում է, որ մոտեցումը ճիշտ չէ։ Եթե վարորդները հրաժարվեն կանչ սպասարկելուց, պատասխանատվությունը նրանց վրա է։

Հաշվապահը հիշեցրեց, որ նախորդ տարի վարորդներից մեկի մեղքով շարքից դուրս է եկել և չի վերականգնվել մեկ մեքենա։ Հիմա այս ենթակայանում կապահովվի ևս մեկ մեքենա։ Հույս ունեն, որ առողջապահության համար նախատեսված բյուջեն կարող է ավելանալ։ Վարորդների աշխատավարձի հարցը համակարգային է, կատարվելու է աստիճանաբար։

Աղբյուր` Փաստինֆո