Փաստ ինֆո

Հայաստանում ականտես ենք լինում ամենատարբեր գույնի բերետների գործունեությանը, որոնք աչքի են ընկնում առավել դաժան վերաբերմունքով: Այս մասին խորհրդարանում քննարկման ժամանակ ասաց «Հայաստան» խմբակցության քարտուղար Արծվիկ Մինասյանը և հետաքրքրվեց փոխոստիկանապետ Արա Ֆիդանյանից՝ թե այս մասով քանի՞ ծառայողական քննություն է իրականացվել, պատժվե՞լ են արդյոք այն ոստիկանները, որոնք դաժան վերաբերմունք են ցուցաբերում քաղաքացիների նկատմամբ:

Փոխոստիկնապաետ Արա Ֆիդանյանը հորդորեց, ոստիկանության գործողությունների մասին խոսելիս զերծ մնալ «դաժանություն» բնութագրումից, քանի որ ոստիկանության ծառայողները կատարում են օրենքով իրենց վերապահված գործառույթները.

«Վստահեցնում եմ՝ շատ դեպքերում շատ ավելի մեղմ են այդ ամբողջն իրականացնում, քան սովոր ենք օրինակ բերել տարբեր զարգացած երկրներում»,-ասաց Ֆիդանյանը:

Փոխոստիկանապետը նշեց, որ 2021 թվականի ինն ամիսների ընթացքում ոստիկանության ծառայողների նկատմամբ կատարվել է 1407 ծառայողական քննություն, որի արդյունքում կարգապահական տույժի է ենթարկվել 412 ծառայող, 329-ը ստացել է նկատողություն, 54-ը՝ խիստ նկատողություն, մեկ ծառայողի պաշտոնային դրույքն իջեցվել է մինչև երեք ամիս, 28 ծառայող ազատվել է ծառայությունից:

Արծվիկ Մինասյանն էլ հակադարձեց Ֆիդանյանին և ասաց.

«Եթե երեխաների աչքի առաջ հոր նկատմամբ նման վերաբերմունք են ցույց տալիս, ինչը համացանցում էր տարածվել, դա ի՞նչ է, կարելի է ավելի խիստ և կոպիտ բառեր օգտագործել, կամ երբ քաղաքացուն փռում են ասֆալտին, դա ի՞նչ է»:

Արա Ֆիդանյանն էլ ասաց, որ երեխաների աչքի առաջ հոր նկատմամբ ոստիկանների կիրառած բռնության դեպքով առկա է քրեական գործ.

«Բայց այն անձը, որին բերման են ենթարկում այդ կերպ ու այն երեխաները, որոնք նույն կադրում են, տարբեր են»,- հավելեց փոխոստիկանապետը:

Պատգամավոր Անդրանիկ Քոչարյանն էլ մեղադրեց Արծվիկ Մինասյանին «դաժան արձանագրումներ» անելու համար. «Մենք շատ ավելի դաժանություններ ենք տեսել՝ Սարի թաղում հանված աչք, Մարտի մեկ և այսպես շարունակ»,-ասաց Անդրանիկ Քոչարյանը՝ արձագանքելով Արծվիկ Մինասյանին:

Աղբյուր` Փաստինֆո