Փաստ ինֆո

ՀՀ ոստիկանությունից հաստատում են, որ Զանգեզուրի պղնձամոլիբդենային կոմբինատի նախկին տնօրեն Մհեր Պոլոսկովի նկատմամբ հայտարարված հետախուզումը ձևական բնույթ է կրում։ Նրա հետախուզման վերաբերյալ տվյալները չեն հանրայնացվում՝ հայտնաբերման գործընթացը բառիս բուն իմաստով տապալելով։

Ինչպես արդեն տեղեկացրել ենք՝ Զանգեզուրի պղնձամոլիբդենային կոմբինատի նախկին տնօրեն Մհեր Պոլոսկովը ՊԵԿ քննչական դեպարտամենտում քննվող քրեական գործի շրջանակներում ներգրավվել է որպես մեղադրյալ, եւ նրա նկատմամբ ՀՀ-ի տարածքում հետախուզում է հայտարարվել։

Հոկտեմբերի 8-ին գրավոր հարցում էինք ուղարկել նաեւ ՀՀ ոստիկանություն՝ խնդրելով տեղեկացնել, թե երբ է Պոլոսկովի նկատմամբ հայտարարվել հետախուզում եւ ՀՀ քրեական օրենսգրքի որ հոդվածով։ Նաեւ խնդրել էինք հայտնել, թե արդյոք նրա նկատմամբ նաեւ միջազգային հետախուզում է հայտարարվել, քանի որ տեղեկություններ կան, որ նա գտնվում է Սուդանում։ Ոստիկանությունը նախ 30 օր ժամանակ էր խնդրել՝ մեր հարցերին պատասխանելու նպատակով լրացուցիչ ուսումնասիրություններ կատարելու համար։ Այսօր արդեն «Փաստինֆո»-ն ստացել է գրավոր հարցման պատասխանը, որով կառույցից մերժել են տեղեկատվության տրամադրումը՝ նշելով, թե, իբր, բացակայում է Մհեր Պոլոսկովի կողմից լրատվամիջոցին տրված համապատասխան լիազորագիրը։

«Ձեր հարցմանն ի պատասխան հայտնում եմ, որ «Անձնական տվյալների պաշտպանության մասին» ՀՀ օրենքի 4-րդ գլխի 15-րդ հոդվածի 5-րդ կետի համաձայն՝ տվյալները սուբյեկտին անձնական տվյալները տրամադրվում են տվյալների սուբյեկտի կամ լիազորագրով հանդես եկող ներկայացուցչի կամ օրինական ներկայացուցչի գրավոր հարցման հիման վրա։ Տվյալ պարագայում Ձեր կողմից հայցվող տեղեկությունների տրամադրումը ենթակա է մերժման, քանի որ բացակայում է Մհեր Պոլոսկովի կողմից Ձեզ տրված համապատասխան լիազորագիրը »,- նշել է քրեական ոստիկանության գլխավոր վարչության պետի տեղակալ, գնդապետ Մկրտչյանը։

Ստացվում է, ոստիկանությունն անձնական տվյալ է համարում Մհեր Պոլոսկովի նկատմամբ հայտարարված հետախուզման հանգամանքն այն պայմաններում, երբ հենց իրավապահներն են հրապարակում հետախուզման մեջ գտնվող անձի լուսանկարը, ճանաչելիության համար անհրաժեշտ տվյալները, որոնց բացակայության պայմաններում հետախուզումն ուղղակի տապալված է ձախողման. Ինչպես պետք է մարդիկ իմանան, որ անձը հետախուզման մեջ է ու իրենց հայտնի տվյալները փոխանցեն, եթե հետախուզվող անձի տվյալները գաղտնի պահվեն։ Եւ բնական է, որ մի շարք դեպքերում ոստիկանությունն է շտապում հայտարարել այս կամ այն անձի հետախուզման մեջ գտնվելու մասին՝ հրապարակելով նաեւ լուսանկարը։

Ոստիկանության կայքէջն անգամ թեթեւակի աչքի անցկացնելով հետախուզումների բազմաթիվ հայտարարություններ արձանագրեցինք եւ մնում է ենթադրել, որ հետախուզվողներից կամ նրանց օրինական ներկայացուցչից լիազորագրեր են ստացել՝ նրանց տվյալները հրապարակելու համար կամ էլ, օրինակ, Երեւանում Քյավառցի Ռաֆոյի սպանության փորձի գործով քիլլերն էր գրավոր լիազորել ոստիկանությանը՝ տարածել իր լուսանկարը՝ որպես սպանության գործով մեղադրվողի։

30 օր ժամանակ խնդրելով հանդերձ ոստիկանությունը չի կարողացել գտնել իրավական որեւէ հիմնավորում՝ տեղեկատվության տրամադրումը մերժելու համար ու ինքն իրեն հեգնել, դրել ծիծաղելի վիճակի մեջ՝ այդպիսով ե՛ւ հաստատելով Պոլոսկովի հետախուզումը, ե՛ւ այդ գործը փակելու քաղաքական հրահանգի առկայությունը։ Այլապես, վստահ ենք, որ ոստիկանությունում կգտնվեր մեկը, որը խորհուրդ կտար նման տկարամիտ պատասխան լրատվամիջոցին չուղարկել։

Ի դեպ, ավելի վաղ հայտնել էինք, որ Զանգեզուրի պղնձամոլիբդենային կոմբինատի բաժնետոմսերի 60 տոկոսը ձեռք է բերել «Գեոպրոմայնինգ» ընկերությունը՝ նախքան բաժնետոմսերը արգելանքից հանելու դատարանի որոշումը կողմերին ուղարկելը։ Այսինքն՝ նախապես տեղյակ են եղել, որ դատարանն արգելանքից հանելու է ու շտապել են որպես «շնորհակալություն» դրանց 15% -ը նվիրել ՀՀ վարչապետի աշխատակազմին։ Մեր տեղեկություններով՝ գործարքի մի մաս է կազմել նաեւ քրեական գործի հետագա ընթացքը. Նոր սեփականատերը՝ ի դեմս Ռոման Տրոցենկոյին, բանակցությունների ընթացքում պահանջել է, որ նաեւ դադարեցվի քրեական հետապնդումը Պոլոսկովի նկատմամբ, ինչի շուրջ ձեռք է բերվել համաձայնություն ու հենց դա է պատճառը, որ դատախազաքննչական մարմիններն ու ոստիկանությունը փորձում են լռության մատնել գործը, քանի որ չգիտեն թե երբ՝ ինչ հրահանգ կիջեցվի քաղաքական հովանավորչություն իրականացնող անձի կողմից։

Աղբյուր` Փաստինֆո