Փաստ ինֆո

Հռոմում կայացած Մեծ քսանյակի (G20) գագաթնաժողովի շրջանակներում Թուրքիայի նախագահ Ռեջեփ Թայիփ Էրդողանը հանդիպում է ունեցել Ֆրանսիայի նախագահ Էմանուել Մակրոնի հետ, որի ընթացքում քննարկվել է նաեւ Հարավային Կովկասում «վեցնյակի» գաղափարը։ Էրդողանը լրագրողների հետ զրույցում ասել է, որ Հարավային Կովկասում դրական քայլեր են նկատում, պատրաստ են վեց երկրների հետ խաղաղության հարթակ ստեղծել։ 

«Նա (Մակրոնը – խմբ.) բարձրացրել է Հարավային Կովկասում իրավիճակի հարցը։ Անցած շաբաթ եղել ենք Ադրբեջանում և ներկայումս Հարավային Կովկասում դրական քայլեր են ձեռնարկվում, և մեր եղբայր Իլհամ Ալիևը վճռականորեն ցանկանում է շարունակել այդ դրական քայլերը…Իսկ այդ հանդիպմանը (Մակրոնի հետ հանդիպման – խմբ.) առաջին պլան է մղվել տարածաշրջանում վեցակողմ պլատֆորմ ստեղծելու հարցը։ Ռուսաստանը, Ադրբեջանը, Թուրքիան, Իրանը, Վրաստանն ու Հայաստանը, եթե նրանք բոլորը համաձայնեն, մենք այստեղ խաղաղության հարթակ կստեղծենք», - լրագրողների հետ զրույցում ասել Է Էրդողանը։

Ավելի վաղ ՌԴ ԱԳ նախարար Սերգեյ Լավրովը Իրանի արտգործնախարար Հոսեյն Ամիր Աբդոլլահիանի հետ համատեղ մամուլի ասուլիսի ժամանակ հայտարարել էր, որ կողմերը քննարկել են «3+3» ձևաչափի ստեղծման հնարավորությունը: Լավրովը նշել է, որ Իրանը՝ ինչպես և Թուրքիան ու Ադրբեջանը, դրական վերաբերմունք ունի այդ նախաձեռնության նկատմամբ, Լավրովը նաև հույս էր հայտնել, որ Վրաստանը և Հայաստանը նույնպես շահագրգռվածություն կցուցաբերեն Հարավային Կովկասի զարգացման վերաբերյալ խորհրդակցությունների և որոշումների համաձայնեցման նման մեխանիզմի ստեղծման հարցում։

Աղբյուր` Փաստինֆո