Փաստ ինֆո

Երևանի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու մասին միջնորդություն է ներկայացվել՝ Նիկոլ Փաշինյանի դստեր՝ Շուշան Փաշինյանն ընդդեմ Նարեկ Սամսոնյանի գործով ինքնաբացարկ չհայտնելու համար։

«Փաստինֆո»-ի թղթակցի հաղորդմամբ՝ ԲԴԽ նիստի ընթացքում ՀՀ արդարադատության նախարարության ներկայացուցիչ Գագիկ Հարությունյանը ԲԴԽ-ում ներկայացրեց դատավոր Նախշքարյանին կարգապահական պատասխանատվության ենթարկելու միջնորդությունը, որի հիմքում դրված է այն հանգամանքը, որ դատավորն ունեցել է կանխակալ վերաբերմունք՝ անչափահաս հայցվորի՝ Շուշան Փաշինյանի օրինական ներկայացուցչի՝ Նիկոլ Փաշինյանի նկատմամբ, սակայն ինքնաբացարկ չի հայտնել։ Ըստ Հարությունյանի՝ դատավորի կողմնակալությունն արտահայտվել է Նիկոլ Փաշինյանի հրահանգով դատարանների շրջափակման, ինչպես նաև՝ Փաշինյանի կողմից դատավորների նկատմամբ «վնգստացող դատավորներ» արտահայտությունների վերաբերյալ դատավորի գնահատականներով, դատողություններով, որոնց մասին խոսել է իր հարցազրույցներում։

Մասնավորապես, դատավորը նշել էր, որ ինքը՝ որպես դատավոր, վիրավորվում է, երբ դատավորներին անվանում են «վնգստացող դատավորներ» և այդ հայտարարությունները կարող են նվաստացնել դատական համակարգը։ Այս հիմքով Շուշան Փաշինյանն ընդդեմ ու Նարեկ Սամսոնյանի գործով հայցվորի փաստաբանը դատավորին ինքնաբացարկի միջնորդություն էր ներկայացրել՝ նշելով, թե իբրև դատավորն ունի կանխակալ վերաբերմունք հայցվորի օրինական ներկայացուցչի՝ հոր նկատմամբ, ինչը մերժվել է, քանի որ դատարանն արձանագրել է, որ չկա որևէ խոսք, որը կարող էր մեկնաբանվել որպես քաղաքական և իր խոսքերը չեն վիրավորում, չեն վերաբերում հայցվորի օրինական ներկայացուցչին։ Նախարարության ներկայացուցիչը գտնում է, որ դատավորը կանխակալ վերաբերմունք ունենալով հայցվորի օրինական ներկայացուցչի նկատմամբ, պետք է ինքնաբացարկ հայտներ, սակայն մերժել է ինքնաբացարկի միջնորդությունը։ Ըստ Հարությունյանի՝ դատավորը թույլ է տվել կոպիտ անփութությամբ դատավարական նորմի խախտում, ինչը հանգեցրել դատական իշխանության վարկաբեկմանը, հանրային վստահության նվազեցմանը։

Հիշեցնենք, որ Երևանի ընդհանուր իրավասության դատարանի դատավոր Զարուհի Նախշքարյանի նկատմամբ կարգապահական վարույթ է հարուցվել՝ Նիկոլ Փաշինյանի դստեր՝ Շուշան Փաշինյանն ընդդեմ Նարեկ Սամսոնյանի գործով ինքնաբացարկ չհայտնելու համար։ ՀՀ արդարադատության նախարարությունը վարույթ է հարուցվել՝ Փաշինյանների փաստաբան Գևորգ Գյոզալյանի ներկայացրած հաղորդման հիման վրա։

Հեղինակ՝ Իզաբել Սահակյան

Աղբյուր` Փաստինֆո