Փաստ ինֆո

«Փաստինֆո»-ն ԱՄՆ-ի Կալիֆորնիա նահանգից ահազանգեր է ստանում, որ վերջին շրջանում ԱՄՆ-ում կտրուկ ավելացել են մաքսանենգ ճանապարհով ներմուծված ծխախոտների ծավալները։

Հայաստանի Հանրապետության մի խումբ քաղաքացիների կողմից, հիմնականում որպես ԱՁ գրանցված, մեծ քանակությամբ և մաքսանենգ ճանապարհով հայկական ծխախոտի արտադրանք է արտահանվում ԱՄՆ։ Ընդ որում՝ մեր աղբյուրի փոխանցմամբ՝ դա իրականացվում է միջազգային ասպարեզում հանրահայտ «DHL» բեռնափոխադրող կազմակերպության միջոցով։

Ծխախոտն արտահանվում է բացառապես հայկական դրոշմապիտակներով՝ Եվրասիական Մաքսային միության ամբողջ տարածքում գործող արգելքների պայմաններում, և անհասկանալի է, թե ինչպես է մաքսանենգ ծխախոտը շրջանցում Հայաստանի Հանրապետության մաքսային մարմինների հսկողությունը և ինչպես է այն հասնում ԱՄՆ։

«Փաստինֆո»-ն կապ հաստատեց «DHL» կազմակերպության հետ՝ մեկնաբանություն ստանալու նպատակով, որտեղից սակայն չպատասխանեցին մեր հարցին՝ նշելով, որ տնօրինությունն անհրաժեշտության դեպքում հետադարձ կապ կհաստատի։

Բեռնափոխադրման ընկերության աշխատակիցներից մեկը, որը չցանկացավ ներկայանալ, «Փաստինֆո»-ի հետ զրույցում նշեց, որ Հայաստանից արտահանվող բոլոր բեռներն անցնում են մաքսային զննում՝ ՀՀ մաքսային օրենսգրքին համապատասխան. «Բոլոր բեռներն անցնում են զննում, և եթե մաքսայինը թույլ է տալիս բեռն արտահանել, արտահանվում է»։

Ասել է թե՝ հարցը մաքսային մարմինների տիրույթում է։

Հիշեցնենք, որ ծխախոտի մաքսանենգության սկանդալային դեպքեր նախկինում եւս արձանագրվել են։

Ոչ վաղ անցյալում՝ 2020թ.-ի ապրիլի 25-ին ՌԴ ԱԴԾ և մաքսային ծառայության աշխատակիցները Կրասնոդարի օդանավակայանում առգրավել էին Հայաստանից երրորդ երկիր փոխադրվող մաքսանենգ ծխախոտի 2700 տուփ։ Տարբեր ապրանքանիշների տուփերի վրա հայկական ակցիզ է եղել։ Ռուսական կողմի տարածած հաղորդագրության մեջ նշված էր, որ բեռը Կրասնոդարի և Դուշանբեի կանգառներով Հայաստանից Աֆղանստան էր տարվում։ Ընդ որում` նշվում էր, որ տրանզիտային օդանավը պատկանում է ՀՀ ԱԻ նախարարությանը։

Այդ տեսանկյունից ողջամիտ է ենթադրել, որ այս դեպքում էլ «DHL» բեռնափոխադրող կազմակերպության միջոցով ծխախոտի մաքսանենգությունը դարձյալ իրականացվում է իշխանությունների կամ նրանց մերձավորների իմացությամբ, թողտվությամբ կամ հանցավոր անգործությամբ։ Հակառակ դեպքում, նման ապօրինությունը մաքսային մարմինների կողմից պետք է բացահայտվեր ու կանխվեր։ Մինչդեռ, ըստ տեղեկությունների, շաբաթվա ընթացքում մի քանի խմբաքանակներով Հայաստանից ԱՄՆ է ուղարկվում ավելի քան 70.000 տուփ հայկական ծխախոտ, որի դիմաց մոտավոր հաշվարկով յուրաքանչյուր շաբաթ շուրջ 10 մլն դրամ գումար պետբյուջե չի մուտքագրվում։

Հարցի վերաբերյալ ակնկալում ենք պատկան մարմինների արձագանքը, եթե, իհարկե, նրանք էլ չունեն խմբային շահագրգռվածություն։

Աղբյուր` Փաստինֆո