Փաստ ինֆո

Սյունիքում տնտեսվարողների նկատմամբ ճնշումները նոր թափ են հավաքում, այս անգամ թիրախում է հայտնվել Զանգեզուրի պղնձամոլիբդենային կոմբինատի հետ համագործակցող «Աժդանակ» ՍՊԸ-ն, որն ունի մի քանի հարյուր աշխատող։ Այս անգամ որպես պատրվակ օգտագործվում է ամիսներ առաջ տեղի ունեցող միջադեպը։

Բանն այն է, որ շուրջ երկու ամիս առաջ ԶՄՊԿ բաց հանքավայրում «Աժդանակ» ՍՊԸ-ին սեփականության իրավունքով պատկանող բեռնատար ինքնաթափի վերանորոգման աշխատանքները ավարտելուց հետո, «Միգ տեխսպասարկում» ՍՊԸ-ի աշխատակից ավտոփականագործ Գևորգ Քյարամյանի ձեռքը մնացել է բեռնատարի թափքի տակ, որի հետևանքով վերջինս ստացել է մարմնական վնասվածք: Դեպքի առթիվ հարուցվել է քրեական գործ, որի շրջանակներում քննիչի բանավոր պահանջով զննություն և փորձաքննություն կատարելու համար բեռնատար ինքնաթափ ավտոմեքենան տեղափոխվել է հատուկ պահպանվող տարածք, որի վերաբերյալ քննիչի կողմից որևէ դատավարական որոշում կամ համապատասխան արձանագրություն չի կազմվել և չի հանձնվել գույքի սեփականատիրոջը:

Վարույթն իրականացնող մարմինը դրանով չի սահմանափակվել. Հիմա էլ պահանջում է, որ բոլոր մեքենաները տեղափոխվեն հատուկ պահպանվող տարածք՝ առանց պարզաբանելու, թե ինչ կապ ունեն 27 այլ մեքենաները տեղի ունեցած նշված դժբախտ դեպքի հետ։ Ի դեպ, տուժած քաղաքացին, բարեբախտաբար, արդեն կազդուրվել է։

«Քննիչը շարունակաբար օգտվելով թողտվությունից, ամեն գնով «Աժդանակ» ընկերության առևտրատնտեսական գործունեությունը խոչնդոտելու դիտավորությամբ դուրս գալով քրեական գործի քննության առարկայից ու ծավալից, բացարձակ առանց որևէ իրավական և փաստական հիմնավորումների վերստին` 2021 թվականի հոկտեմբերի 29-ին հանձնարարել են ոստիկանության Կապանի բաժնի աշխատակիցներին Ընկերության սեփականությունը հանդիսացող XCMG մակնիշի բոլոր (թվով 27 հատ` 25-60 տոննա բեռնատարողությամբ) բեռնատար ինքնաթափ ավտոմեքենաները տեղափոխել ոստիկանության բաժնի հատուկ պահպանվող տարածք»,- «Փաստինֆո»-ի թղթակցին ասել է փաստաբան Հովսեփ Սարգսյանը՝ նշելով, որ միայն, 2021 թվականի սեպտեմբերի 2-ից մինչև հոկտեմբերի 29-ն ընկած ժամանակահատվածում երկու բեռնատար ինքնաթափ մեքենաները չշահագործելու հետևանքով «Աժդանակ» ընկերությանը փաստացի հասցվել է 77.990.625 ՀՀ դրամի նյութական վնաս, իսկ ՀՀ պետբյուջեին ԱԱՀ-ի հարկի գծով` 15.598.125 ՀՀ դրամի վնաս:

Փաստաբանի արձանագրմամբ՝ քննիչի գործողությունները ոչ միայն նախատեսված չեն քրեադատավարական օրենսդրությամբ, այլ նաև դուրս են իր դատավարական լիազորություններից եւ պահանջում են քրեական գործ հարուցել իր լիազորություններն ակնհայտորեն չարաշահող քննիչի նկատմամբ։

Ի դեպ, ՔԿ-ի գործողությունների հետեւանքով, այսօր արդեն խաթարվել է սահմանամերձ մարզում մի քանի հարյուր աշխատատեղ ապահովող ընկերության աշխատանքը, որի արդյունքում այսօր աշխատակիցներն արդեն դիմել էին բողոքի ակցիաների։

Աղբյուր` Փաստինֆո