Փաստ ինֆո

ՀՀ նախկին գլխավոր դատախազ, ՀՀ ՔԿ նախկին նախագահ Աղվան Հովսեփյանի նկատմամբ ընտրված խափանման միջոց կալանավորումը ևս երկու ամսով երկարացնելու մասին միջնորդություն է ներկայացվել, որը կքննի Վերաքննիչ քրեական դատարանի՝ այս իշխանություններին բազում ծառայություններ մատուցած դատավոր Մհեր Արղամանյանի որդին՝ նորանշանակ դատավոր Դավիթ Արղամանյանը։ Աղվան Հովսեփյանի պաշտպան Էրիկ Ալեքսանյանը «Փաստինֆո»-ի հետ զրույցում ասաց, որ միջնորդության քննությունը դատավոր Դավիթ Արղամանյանին մակագրելը պատահական չի համարում։

«Հայրը՝ Մհեր Արղամանյանը, քննարկում է մյուս քաղաքական գործերով կալանքները, իսկ տղան՝ շարունակում է այդ շղթան, տվյալ դեպքում՝ Աղվան Հովսեփյանի գործով»,- ընդգծեց Ալեքսանյանը։

Նշենք, որ Դավիթ Արղամանյանը նոր ձևավորված՝ մինչդատական վարույթի գործեր քննող դատարանի դատավոր է նշանակվել օրերս, իսկ դատավոր նշանակվելուց հետո նրան անմիջապես մակագրվել է հենց Աղվան Հովսեփյանի նկատմամբ ընտրված խափանման միջոց կալանավորումը ևս երկու ամսով երկարացնելու միջնորդությունը։

Ընդ որում, վերջինիս հայրը՝ Վերաքննիչ քրեական դատարանի դատավոր Մհեր Արղամանյանը մասնագիտական հանրության շրջանում հայտնի է որպես իշխանություններին բազում ծառայություններ մատուցած դատավոր, ավելին, ըստ շրջանառվող լուրերի, հենց Մհեր Արղամանյանի ծառայությունների դիմաց է որդին նշանակվել դատավոր։

պաշտպանական կողմը դատավոր Դավիթ Արղամանյանի կողմնակալության հարցը կբարձրացնի հենց դատական նիստի ընթացքում՝ ինքնաբացարկ հայտնելու մասին միջնորդության շրջանակներում։

Փաստաբանը հիշեցրեց, որ բոլորովին վերջերս քրեական գործերից մեկով (Առուշ Առուշանյանի գործով) դատավոր Մհեր Արղամանյանին ասել է, որ նրան՝ որպես դատավորի չի վստահում և հայտարարել, որ այդ անվստահությունը բխում է նրանից, որ այսօր Մհեր Արղամանյանն այն դատավորներից է, որն իրականացնում է իշխանությունների կամքը, ուստի, Մհեր Արղամանյանի որդին՝ Դավիթ Արղամանյանը, չէր կարող այդ մասին չիմանալ, ծանոթ չլինել իր հոր նկատմամբ փաստաբանի վերաբերմունքին։

«Անկողմնակալ դիտորդի տեսանկյունից հնարավոր է, որ վերջինս իմ՝ որպես Էրիկ Ալեքսանյան փաստաբանի նկատմամբ, ունենա կողմնակալ վերաբերմունք, ինչը պայմանավորված է իր հոր նկատմամբ իմ բացասական վերաբերմունքով»,- նշեց փաստաբանը՝ հավելելով, որ ինքը Մհեր Արղամանյանին բազմիցս է քննադատել։

Բացի այդ՝ Դավիթ Արղամանյանը նախկինում մասնակցում էր բողոքի ակցիաների՝ ընդդեմ ՀՀ երկրորդ նախագահ Ռոբերտ Քոչարյանի։
«Դավիթ Արղամանյանն այն անձն էր, որը կանգնում էր դատարանի առջև՝ պաստառներով և իր բացասական վերաբերմունքն էր արտահայտում Ռոբերտ Քոչարյանի նկատմամբ՝ որպես նախկին։ Բացի պաստառներով ցույցերի մասնակցելուց՝ նա նաև սոցիալական ցանցերում բազմիցս իր բացասական վերաբերմունքն է արտահայտել Ռոբերտ Քոչարյանի նկատմամբ, իսկ Ռոբերտ Քոչարյանն այն անձն է, որի նախագահության ժամանակ պարոն Հովսեփյանը եղել է նաև գլխավոր դատախազ»,- նշեց Ալեքսանյանն՝ ընդգծելով, որ Արղամանյանի նման վերաբերմունքը նախկին իշխանությունների նկատմամբ, օբյեկտիվ դիտորդի տեսանկյունից, անաչառ չի կարող ցույց տալ։

Հիշեցնենք, որ Աղվան Հովսեփյանը ձերբակալվել է սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը դատավոր Մնացական Մարտիրոսյանի կողմից բավարարվել է։

Ընդ որում՝ մոտ 45 տարի իրավապահ կառույցներում ամենաբարձր ղեկավար պաշտոններ զբաղեցրած Աղվան Հովսեփյանին նախաքննական մարմինը չի կարողացել իր ծառայական գործունեության հետ կապված որևէ ապօրինություն մեղսագրել։ Նրան մեղադրանք է առաջադրվել ապօրինի ձեռնարկատիրական գործունեություն ծավալելու, ենթադրյալ փողերի լվացման հատկանիշներով։ Ընդ որում, կալանավորման որոշումը կայացնելիս անգամ դատարանն արձանագրել է, որ բացակայում է քննությունից թաքնվելու հավանականությունը, ու որպես կալանավորման հիմք մատնանշել նրա նախկինում զբաղեցրած բարձր պաշտոնները, թե, իբր, կարող է ազդել քննության վրա՝ առանց որեւէ փաստացի օրինակ մատնանշելու։

Հեղինակ՝ Իզաբել Սահակյան

Աղբյուր` Փաստինֆո